«Идалыкын янлыкше» конкурс. Суртыш пиалым конден

Йӱк-йӱаным  колын, сурт гыч оза куржын лектеш. Огеш умыло, молан пий опта? Оза пий ӱмбак уло шыдыж дене кычкыралешат, пӧртыш пурен кая. 

Мераҥ тидым ужеш да пий деч йодеш:

- А молан озат тыгай осал?

- Эртыше ийыште озамлан шуко йӧсым чыташыже логале, садлан тыгай шыдан лийын, - пелешта пий. - Тыглайже тудо моткоч поро чонан. Уэш ту жапым пӧртылташ ыле. Ме вет тунам пырля сонарыш коштынна, пырля кӱтӱм кӱтенна, вӱдеш йӱштылынна. Чыла вере воктенже налын. Эх-х.

Пий шоналта да мераҥ деч йодеш:

- А можыч, тый мыйын озам дене илаш кодат?

- Молан? 

- Тый вет тенийсе идалыкын символжо улат! Ойлат, тудо кажне суртышко пиалым конда. А пӧртышкӧ мераҥ шке толын пура гын, эше сайрак огыл мо? Теве тыйым тышке нигӧ ӱжын огыл, а тый лач мемнан унана лийыч. 

-  Чынак тыге шонет?

- Чынак веле мо? Озам эре черлана да черлана. Кодший пакчаште пареҥгынат ыш уҥо. А эше озаватын ӱдыржӧ нигузе марлан каен огеш керт. Кызытсе саманым шотыш налын, тек кугу тӱняштына уэш тыныслык озаланаш тӱҥалеш. 

- А мылам тышечын могай пайдаже?

- Тыйым тыште пукшат, йӧратат.

- Келшем. Озатым ӱжын лук.

Пий опташ тӱҥале. Оза лекте. Тудын йолжо воктеке мераҥ тӧршталтен толын шогале. Айдеме тудым ужо, кидышкыже нале, шокшыш-шокшын ӧндале да пеленже кудышкыжо пуртыш.

Кум тылзе эртыш. Оза паремаш тӱҥале. Ӱдыржӧ  качымарийым муо.

Эше кум тылзе гыч озаже йӧршынак тӧрланыш. Ныл тылзе гыч ӱдыржӧ марлан лекте. 

- Илышна эркын саемеш. Сеҥымаш кечат лишемеш, - мераҥ ял калыкым ӱшандара. 

Мераҥ ий эртыш. Оза унаж деке тунем шуо. А мераҥ ойла:

- Мылам каяш кӱлеш, мыйын ий эртыш.

- Ала тый мемнан дене илаш кодат? Ме ынде Шарик дене тый дечет посна иленат огына керт, йӧсӧ лиеш.

- Эше теве мом каласынем: мый пӧртыштӧ илыше янлык омыл, мылам яндар юж кӱлеш. Ик ий деч утларакшым суртышто ом чыте.

- Келшет гын, кролик дене пырля илаш тӱҥалат. Шарикат тендан воктенак лиеш. 

- Ура-а-а! - куаныш Шарик.

- Тугеже ме ынде иза-шольо улына! - мераҥат куанжым шылтен ыш керт.