Все новости
Конкурс!
12 Пургыж 2023, 19:26

«Идалыкын янлыкше» йомакым умбакыже шуена

Пайрем водын У ий водын, кочкышым кычалын, мераҥ садвечышке толын. Телым чодыраште келге лум йымалне ала-момак кычал муаш ок лий, мӱшкыр эре шужен коштеш. А  ялыште, пакчаш пурен, олмапумат авызлен  лекташ лиеш… Но трук кугу йӱкан пий кудал лектеш да мераҥым авырен шогалеш!...

«Идалыкын янлыкше» йомакым умбакыже шуена
«Идалыкын янлыкше» йомакым умбакыже шуена

Пий оптымо йӱкым колын, издер дене мунчалташ лекше йоча-влак куржын тольыч. Нуно мераҥым ужычат, пеш куанышт. «Ит опто, тиде мемнан мераҥ йолташна унала толын», - ойлат йоча-влак. Паледа вет, пий айдемын ӱшанле йолташыже улеш, садлан пайрем водын мераҥынат йолташыже лияш келша. 

Теве ынде садвечыштак У ий пайремым вашлияш каҥашышт. Ик йочаже олмапуэш кешыр-влакым сакалыш, вес йочаже ковышта лышташым кередыш, кумшо йоча кинде шултышым, икмыняр олмамат вераҥдыш. Пийланат пайрем лийже манын, шыл падырашым олмапу укшыш керльыч. Тыге олмапу У ий кож дечат утларак сӧрал лийын шогале. 

Мераҥ кушталтен колтыш. Пият, кокйола шогалын, пӧрдын савырныш, а йоча-влак сылне мурым муралтышт. Пытартышлан олмапуэш пижыктыме пӧлек-влакым пуэден лектыч. Пайрем чылалан келшыш. Мераҥ пеш куаныш, йоча-влак деч налме пӧлекшым нӧлталынат огеш сеҥе. Пий тудлан нумалаш полша,   чодыра марте  ужатен колта. А йоча-влак тыгай пайремым эше ыштена манын  сӧрышт.

Автор:Яна ИВАНОВА, Мишкан район Чорай селасе Яныш Ялкайн лӱмеш марий гимназийын 7-ше классыштыже тунемше.
Читайте нас: