«Идалыкын янлыкше»: Озажын суртшым оролат

- Салам! О-о, кӧм мый ужам?! Тый тышке могай пӱрымаш дене толын лектыч?  Мый тыйым кочкынат кертам!

 - Ит коч мыйым, мый тыланет мастарын куштен пуэм,- мераҥ лӱдын пелешта да кушташ тӱҥалеш.

- Шыч ӧрыктаре тый мыйым! - ӱскыртланен ойла пий.

Мераҥ адак сӧрвала:

-  Тугеже шкемын йӧратыме муремым муралтен пуэм.

Мераҥ мураш тӱҥалеш:

 - Олма чевер, олма чевер,  олма чевер путырак. 

Олма дечын, олма дечын марий ӱдыр чеверрак. 

Пий шинчам карен онча: 

- Ой, могай сылне муро, но шӱмыш ыш воч. Мый тыйым чечас кочкам. 

Мераҥ адак шонаш пиже: «Ынде кочкын колта гын, илышем пытыш». Шоныш мераҥ, шоныш да шонен лукто.

- Пий йолташ, мый вет тале боксер улам. Келшет гын, икмыняр приемжым ончыктенат кертам. 

- Почан боксерым нигунам ужын омыл, ончалаш оҥай ыле. 

Мераҥ кок-кум гана тӧршталтыш да пушеҥгым чумал колтыш. Ынде пий шонаш пиже: «А эше лӱдшӧ мераҥ маныт! Тиде «боксерет» мыйым ик-кок гана солалтен колта гын, йолем шуялтен возамыс. Тыгай шужышо янлык ала-момат  ыштен кертеш... Лучо шке будкышкем наҥгаен пукшем, ала вес гана мыйымат утара». 

Пий чодыра унам пырля каяш ӱжеш. Мераҥ у родыжо почеш оҥ кадыртен ошкыл колта, пуйто ӱмыр мучко пырля иленыт. 

Теве тыге мераҥ ден пий келшен илаш тӱҥалыт. Порын вашлиймым ужын, мераҥ тышке молан толмыж нерген каласен. Мемнан кундемыште илыш эре тыныс лийже, порылык озаланыже манын, Йӱштӧ Кугыза тудым лӱмын тышан волтен коден. Ынде ик ий мучко мераҥ мемнан аралтышна лиеш.

Ойлат, нуно коктын черет дене озажын суртшым оролат: иктыже осал вий деч, весыже - осал еҥ деч. Шоҥгыеҥ манмыла, кугурак деч лӱдыт, изирак деч вожылыт.