У ий пӧлек - у идалыкыште поро кумылан лияш

Тыге Бирск олаште сентябрьыште эртыше научно-практический конференцийыште пунчалым лукмо почеш шке мутыштым шуктышт, а молышт шыпак ӧрдыжеш кодыч. Ушештарена: Бирск районысо подписчик-влаклан электрочайникым ямдылыме ыле (Д.И. Ибашев), Краснокам районышто Р.А. Сатаева тыгаяк электрочайникым, Шаран районышто В.Б. Миндияров ден Н.М. Давлетова землякышт-влаклан ик пӧлекым веле огыл, кум шокшо одеялым, Дӧртыльӧ районысо лудшо-влаклан А.В. Камильянов 3000 теҥгелан сертификатым налыныт, Мишкан район гыч В.Т. Байбулатовын ямдылыме микроволновкыжым модын налаш шонышо-влак пеш шуко квитанцийым колтеныт ыле. А тӱҥ пӧлекым - редакций деч бензопилам - чыла районласе лудшо-влак коклаште модмашке пуртенна.

У ий вашеш мотор кож воктене Йӱштӧ Кугыза дене пырля модмашым эртарыме поро йӱланам шукташ редакцийышке уна-влакым ӱжна, а квитанций-влакым яшлык гыч лотерей семын Нефтекамск оласе 14-ше школын нылымше классыштыже тунемше Софья Яковлева луктедыш (туныктышыжо Л.Ш. Калиева). «Визытан» отметкылан гына тунемше изи ӱдырын кидше «куштылго» лие, пӧлек-влакым «Чолман» газетын тыгай лудшыжо-влак модын нальыч: Шаран районышто - Н.А. Минлина (Тошто Тумбагуш), С. Асылгузин (Мешер), Л.М. Ибатуллина (Шаран села); Мишкан - Н. Айнушева (Чорай); Бирск - И.Н. Айгузина (Кужнур); Краснокам - С.А. Янышин (Музек); Дӧртыльӧ - В. Янабаева (Маядык).

А редакцийын пӧлекше Дӧртыльӧ районысо Елтек ялыш кая. Сулен налме канышыш лекше туныктышо, газетнан лудшыжо гына огыл, возгален шогышо авторна А.Т. Асылбаева бензопилан озаже лиеш. Пӧлекым модын налше-влакым да чыла лудшым У ий дене саламлена! Лудшына-влак шукемышт манын, поро пашашт дене полшышо нине вич районын марий мер организацийыштым вуйлатыше-влаклан тауштена, тек толшо идалык кажныдан ӱшанжым сула да пиаланым ышта!