АВА ЭН ШЕРГЕ МЫЛАННА

Мемнан авайна 1954 ий 23-шо декабрь тылзыште Пошкырт кундемысе Калтаса районышто Тошто Оръямучаш ялеш шочын.

Шолым тунем лекмек, авай Иваново олашке пашам ышташ каен, фабрикыште ургызо лийын ыштен. У ийым вашлияш толмыж годым  ачайлан марлан лектын, тыге Тошто Оръямучаш ялешак кодын. Умбакыже  авайын ӱмыржӧ ял да колхоз паша дене пеҥгыдын кылдатын. Шым икшывым ончен куштен. Кызыт авайын кандаш уныкаже да ик кугезе уныкаже кушкыт.

Илыш мемнам, авайын икшывыже-влакым, кызыт тӱрлӧ верыш йогын гай шалатен колтен. А кунам погынена кугу ешна дене, авайым муралташ йодына. Тудо шуко мурым пала, самырык годсыжо сем-влакым шарна. Шочмо сурт гычын кеч-могай торашке огына кае гынат, шӱмышто авайын семже ила, чонышто тудын йӱкшӧ йоҥга. А могае вужга мелнам авай кӱэштеш! Тамжым кызытат тӱрвыштем шижам.

Авайнам чот пагалена, йӧратена, вет шуко вийым мылана пуэн! А телым гын, икшывыже-влак ынышт кылме манын,  йӱдшӧ-кечыже  кид пашам ыштен. Тудлан тазалыкым тыланена!