АВА ЭН ШЕРГЕ МЫЛАННА

Мемнан авана Калтаса районысо Торасола ялеш 1964 ий 24 декабрьыште Яныбаевмыт ешыште шочын. Ешыште нылытын кушкыныт: авам  да кум шольыжо. Пырля ваш келшен илат.

Школ деч вара Благовещенск олаш педучилищыш тунемаш каен. Кызытат тунемме йолташыже-влак дене кылым куча. Училище деч вара Калтаса районысо Тошто Оръямучаш ялыш йолташыж дене тӱҥалтыш школыш туныкташ толыныт. Тиде ялыштак ешаҥыныт. Авам Бирскыште пединститутым заочно тунем пытарен.  Ынде теве  39 ий Тошто Оръямучаш ялыштак ила да пашам ышта. Пытартыш 5 ий жапыште 1-4 классым шкетынак туныкташыже перна.

Авам ден ачам Андрей изамым да мыйым, Светлана ӱдырыштым, ончен куштеныт. 11 ий ончыч ачамын ӱмыржо лугыч лие, авамлан суртым шкетак кучаш пернен. "Йӧсо гынат, чытыман," - тыге ойлен мыланна. Илышыште пеҥгыде лияш туныкта.

Ынде ме изам дене коктынат  ешаҥынна. Авам кум уныкан коваже улеш.

Ме чылан тудым аклена, кугешнена, йӧратена, вет  мемнан илышнам  поро кече гай волгалтара!