«Йӧратем» манаш вашкыза

Кажне еҥ, йоча пагыт гыч тӱҥалын, пытартыш кече марте шкенжын чоныштыжо ава нерген шонымашым ашна. Ава - эн лишыл еҥна, чыла умыла да проститла, чамана да уло кумылын йӧрата. Мыланнат аваланна «йӧратем» манын ойлаш вашкыман, вниманийым ойыраш ӧрканыман огыл.
Мемнан авана - Нина Султановна Курмангалина - Янахмат ялыште шочын-кушкын. Школым тунем пытарымек, «Сюнь» колхозышто дояркылан ышташ тӱҥалын. Вара Тумбагуш ялыш Бекьянлан марлан лектын. Пырля кок ӱдырым да йыгыр эрге-влакым ончен куштеныт. Кызыт чылан ешан да шке веран улына. Авана - латкум уныкан да вич кугезе уныкан ковашт.
Тудо сулен налме каныш марте Тумбагуш фермыште ушкалым лӱштен да сӧснам ончен. Шуко гана Чап грамот дене палемдалтын. Пашам сайын ыштымыжлан Трускавец оласе санаторийыште путевка дене канен толашат пиал шыргыжалын. Пагытыштыже Тумбагуш клубын «Ший памаш» фольклор ансамбльыштыже мурен-куштен кошто.
Мемнан авана унам вашлияш йӧрата, кажне толшо еҥым сийлен колта. Аваланна, икшывына-влакын коваштлан, мланде марте вуйым савен, тау мутым ойлена да пеҥгыде тазалыкым, пиалым, кужу ӱмырым тыланена.