Авана, поро деч порым тыланена!

Ава - тÿняште эн лишыл айдеме. Тудын деч посна илышат огеш лий. Ава пукша, йÿкта, чикта, неле годым поро мутшо дене шымата.
Мыйын авам, Марина Идрисовна Файрузова (ÿдыр фамилийже Калимьянова), Пÿрö районысо ямле Кужнур ялеш шочын-кушкын. Шочмо ялыштак йӧратыме пелашыжым вашлийын, ешым чумыреныт. Ме ешыштына кумытын улына. Сильвия акам ешыж дене Пÿрӧ олаште ила. Мый, Алмаз, 9-ше классыште тунемам, Радмир шольым йочасадыш коштеш. Авам ялсоветыште пашам ышта. Эрдене эр кынелын, мыланна тамле кочкышым ямдыла, сурт сомылым ышта, тунемаш ужатен колта, вара пашаш кая.
Школ гыч толам - авам мемнам суртышто тамле кочкыш дене вуча. Аваем пидеш, тÿрым тӱрла, нимом ышташ ок öркане. Ме малаш возына, а тудын эшеат сомылжо уло. Мый шканем ала-мыняр гана «Авам кунам мала?» йодышым пуэнам.
Поро кумылан аваем, шушаш пайрем дене саламлем, поро деч порым - пеҥгыде тазалыкым, йолгорно гай кужу ӱмырым, илышыштет да коштмо корныштет пиалым - тыланем! Ме тыйым пеш чот йӧратена да пагалена!