Авана мыланна эн шерге!

Ава - эн лишыл, эн шерге айдеме. Аван йӧратымашыже илышыште вашлиялтше чыла нелым сеҥаш полша. Кажне ава икшывыжым пашам йӧраташ, поро лияш, Шочмо Элым пагалаш туныкта. Мемнам тудын деч сайрак нигӧ ок умыло, садлан ойго годымат, куанле пагытыштат авана дек миен эҥертена. 

Мемнан авана - Людмила Саляевна Александрова (Ахмадиева). Тудо 1960 ий 9 августышто Калтаса районысо Павасола ялыште куд икшыван ешеш шочын, эн кугу ӱдыр улеш. Кандашияш школым тунем лекмеке, «Совет Армий» колхозышто пашам ыштен. 1980 ий апрельыште сай пашазе улмыжлан «Совет Армий» колхоз Одесса олаш канаш колтен. Тушто ачана ден палыме лийыныт. 1980 ий 3 июльышто Николай Васильевич Александров дене сӱаным ыштеныт. Тыге мемнан авана ямле Амчемучаш ялыште илаш тӱҥалын. Ныл икшывым ончен кугемденыт. Кумытшо ешан улына. Эн кугу эрге - Анатолий, Североморск олаште ешыж дене ила, военный улеш. Кокымшо эрге - Алексей, ешыж дене Ижевск олаште ила, сварщик профессийым ойырен налын. Кумшо икшывышт - Жанна, воспитатель, ешыж дене Краснохолмский селаште ила. Артур эргышт ава-ача пелен улеш.

Людмила Саляевна ден Николай Васильевичым ныл ӱдыр да кок эрге уныкашт-влак куандарат. 

Авана пеледышым чот йӧрата. Пӧртыштыжӧ шуко тӱрлӧ пеледыш (орхидея, герань, фиалка ) кушкеш. А кеҥежым оралтыштыже тошкалаш лӱдат - могай гына пеледыш уке! Петуния, роза, лилия, сальвия, георгин, флокс - чылажым шотленат от пытаре! Шокшо, йӧратыме авайна, шушаш пайрем дене саламлена. Тумо гай пеҥгыде тазалыкым, кужу ӱмырым тыланена. Рыскалан лий. Вуй ӱмбалне тыныс илыш лийже. Авай, ме тыйым йӧратена!