Авана мыланна эн шерге

Мыйын авам - Наталья Яковлевна Байрамова - 1956 ийыште Мишкан районысо Озерка ялыште шочын, куд икшыван ешыште икымше йоча лийын. Мишкан кыдалаш школым тунем лекмек, Иваново олаште куымо фабрикыште пашам ыштен. 

1975 ийыште Михаил Байрамовлан марлан лектын. Ачам ден авам кок ӱдырым да ик эргым ончен куштеныт. Кумытынат илышыште шке вернам муынна. Лариса лапкызылан, мый Мишкан краеведений библиотекыште марий калыкым обслуживатлыме секторыште, Ульян вахта йӧн дене Йӱдвелне водительлан ыштена. Авамым шым уныка куандара, Наталья кувавашт нунылан эн поро улеш.

Авам коло ий стройкышто штукатур-малярлан тыршен. Сай пашажлан тудым ятыр гана Чап грамот дене палемденыт. Мыланнат, икшывыже-влаклан, шке пӧртым чоҥымо годым эре полшен шоген. 

Авам изинек спортлан шӱман лийын, МПМК-ште ыштымыж годым ече дене таҥасымашлаште призовой верлам наледен. Тыгак художественный самодеятельностьышто участвоватлен. 1995-ийыште, МПМК шаланымек, ветстанцийыште техпашаеҥлан ышташ тӱҥалын. 2011 ийыште сулен налме канышыш лектын.

Мыйын авам яра шинчылтын ок мошто, тӱрлӧ кидпашам ыштылаш йӧрата: крючок да име дене пидеш, «алмаз» пырче-влак гыч сӱретым пога, тӱрла. Иктаж-мом уым, моторым ужеш гын, ыштен ончымыжак шуэш. Авам мураш йӧрата, пайрем годым шӱжарже-шольыжо-влак, пырля погынен, гармонь сем почеш марла мурат- куштат. Костя шольыжо (Тудо калыклан мурызо семын палыме) шке мурыжо-влакым мура. 

Йӧратыме аваемым Аван кечыж дене саламлем! Таза, пиалан, кужу ӱмыран лий!