Куголя ден игыже-влак

Ик ояр каныш кечын коля-влак шочшышт деке унала миен толаш шонен пыштышт. Корно дене кайымышт годым тӱрлӧ модыш дене модыч, икте-весыштлан туштым туштышт.

Но кенета чурик чарнен шогальыч.

- Мо тыгай? - пелештыш ава коля.

- Авай, йышт лий, - маньыч игыже-влак.

Мӱндырнӧ огыл йоча-влакын йӱкышт шоктыш. Чылан лышташ йымак шылын шинчыч да йырым-йыр мо ышталтмым шып гына эскераш тӱҥальыч. А тушто йоча-влак экскурсийыш толыныт улмаш. Эрге-влак мече дене модыныт, ӱдыр-влак шӱрым шолтеныт. Коклаштышт ик чулым эрге лийын. Коляиге-влак коклаштат тыгаяк чулым улшо Мику саде эргым пеш чот ончен шинчыш. Йоча-влак мӧҥгеш каяш тарванымек, тиде йоча пеш койышланымыж дене чайгоркажым монден кодыш.

Коля-влак лышташ йымач лектыч да мландыш волен вочшо кинде пудыргым кочкыч, кӧстенечланат нальыч. А Мику саде чайгорка йыр пӧрдӧ, тушто мо улмым палынеже ыле. Кенета саде чайгоркаш бултых! пурен кайыш. Почешыже молыштат тӧрштышт.

Ава-ача коля-влак нуным утараш пижыч, кажныжым поче-поче шӱдырен луктыч. «Мом шонен, тушко пурышда?» - вурсаш тӱҥале нуным авашт. Коляиге-влак рыҥ гына шогальыч да Мику велыш ончальыч. А тудыжо чай кучаш варналт пытен, мом каласашат огеш пале. Лӱдмыж дене шорташат тӧча… Ача-авашт вигештымат чаманен ӧндальыч.

- Йӧра игече ояр, кылмеда ыле вет, чукаем-влак, - мане ава коля.

Вургемыштым коштышт, да коляиге-влак ача-авашт почеш шып гына ошкыльыч. Тыге нуно шочшышт дек миен шуыч, кӧстенечлан погымо кинде пудыргым ӱстембак луктын пыштышт. Чайым йӱыч, мо нунын дене лиймым воштыл-воштыл ойлен шинчышт. Иге-влак ача-аваштлан уремыште шкеныштым сайын кучаш, мутыштым колышташ сӧрышт.

Кече кас велыш тайнымек, коля еш мӧҥгыжӧ тарваныш. Иге-влак корнышто шкеныштым тыматлын кучышт. Мӧҥгӧ миен шумек, сурт сомылым ворандарышт да каналташ возыч. Йомак умбак, мый тембак!