Куголя ден игыже-влак

Авашт коляиге-влакым ойгырен кычалаш кайыш. Пасушто кычале, чодырашке савырнале. Туштат ыш му. Йÿд лиймеке веле мöҥгыжö толын шуо. Окна воктеке шинчын, эр марте шортын эртарыш. Волгалтмеке, уэш корныш тарваныш.

Коляиге-влак, шылын модын, сурт деч шукылан торлымым шижын огытыл. Ик йÿдым чодыраште эртареныт.

Куголя чодыра корно дене куржо. Кугу пÿнчö укшышто урым ужо. «Мо лие, коля тос, куш тынар кудалат?» - йодо ур. «Изи игем-влакым йомдарышым. Ынде кушто кычалашат ом пале. Ала тый ужыч?» «Уке, шым уж», - вашештыш ур. «Ужат гын, пöртышкет пурто, тый вет поро улат, чамане мемнам. Пöртылшемла, тый декет пурем». «Келшем. Мыйынат тыланет полшымем шуэш, но кузе тидым ышташ - ом пале». «А тый могай пушеҥгыште илет?» «Тевыс ужат, тыште, патыр гай пеҥгыде пÿнчыштö мыйын шокшо суртем. Тушто чылалан вер сита. Мый уна-влаклан эре куанем». «Поро мутетлан тау. Мыйын корнем кужу, умбакыже кудалам». «Корнан лий, коля родо!»

Тиде жапыште коляиге-влак эҥер серыште, ошмаште, тамлын маленыт. Кече шыраташ тÿҥалмеке, иктын-иктын помыжалтыч, но иктынат кынелмыже ыш шу, шокшышто шыранен кийышт. Эн изи шольыштын гына модмыжо пеш чот шуо, сандене, изаж-влак деч ойырлен, олык тÿрыш лекте. Ты жапыште колян вуйышкыжо пÿгыльмӧ толын логале. Коля, лÿдын, вуйжым нöлтале. Тушто кужу почан мотор ур шинчен. «Молан тыгай кугу чодыраште шкетын коштат? Ала йомынат?» - йодо ур. «Йомынна. Теве умбалне изам-влак канат. Ме аванам йомдаренна, кушто улына, шкеат огына пале. Мыйын кызыт модмем шуо да изам-влак деч кайышым». «А молан мӧҥгӧ корным огыда кычал? Тендам авада ойгырен кычал коштеш». «Тый мемнан аванам вашлийыч мо?» «Вашлийым». «Тунам айда авай деке каена».

Нуно изаж-влак деке мийышт. Чылан погынен, урын пöртышкыжö ошкыльыч. Суртышкыжо пурышт веле, авашт толын шуо. Коляиге-влак моткоч куанышт. Чылан пырля мöҥгышт кайышт. Мöҥгö шушаш годым кугу йÿр оптале. Ик жап гыч кече шыргыжале. Коля еш дене пырля пÿртÿсат куаныш.

Авашт, коляиге-влакым шокшын пÿтырен, кошкаш пыштыш.

Тетла коляиге-влак авашт деч изишланат кораҥын огытыл.