У ий дене саламлем!

Куголя ден игыже-влак

Да ача дене ава -

Кугу еш келшен илен,

Икте-весым йӧратен.

Йоча-шамыч модылдаш

Йӧратеныт... Да шылаш

Шонен пыштышт ик кечын,

Погыналын лу пырчын.

Кеҥеж кече мотор пеш,

Мӱндыркат каяш лиеш.

Шуко уым ужылден

Коштыч коля-влак, шурген.

Трук ончальыч: кож шеҥгеч

Лектеш пырыс кугу пеш.

Межше ӱлыкӧ кеча,

А шинчаже шып онча.

Мо тыгае? Мо паша?

Пырыс мом тыште ышта?

Йодыш шуко... Чодыра -

Илыме вер мо... пырыслан?

А пырысше жал коеш,

Чаманаш веле лиеш:

Шинчавӱдшат пеш йога,

Да чапажат вет апа...

Коля-шамыч чумырген

Келшышт: пырыс дек миен,

Кӱлеш тудым колышташ.

«Мо тугай лийын, йолташ?»

Пырыс, поро мутым колын,

Виянракын колтыш шортын:

«Мыйын шоҥго лиймемлан

Озам «Кай!» мане мылам...

Поктен колтыш йӧршешлан

Кугу пич чодыраш... «Молан, -

Манеш, - шоҥго суртыштем,

Чолгаракым мый налнем!»

Коля еш тыгай мутлан

Йӧршын ӧрын:

«Мемнан ешыште тыгай

Нигунам лийын ок кай.

Икте-весым йӧратен

Илена ме, ваш келшен.

Пырля мурым мурена,

Пашам пырля ыштена...»

Коля-шамыч пырыс ден

Шуко шинчышт кутырен...

Кече шып ӱлык вола -

Кече касыш савырна.

Трук кӱдырчӧ рашкалтен,

Йӱр тӱҥале ложгыктен.

Чылтак нӧрышт йолташ-шамыч:

Лышташ-влак йымак шикшалтыч!

Мӧҥгыштӧ коля-ава

Тышке-тушко коштеда:

«Йоча-шамыч йомыныт!

Кушто нуно модыныт?!»

Кеҥеж йӱдшӧ кӱчык пеш...

Кече лекте... Волгыжеш...

Коля-влак да пырысна

Эркын толыт мӧҥгешла.

Ава йӱдвошт ойгырен,

Шинчавӱд йоген пытен,

Уремышке ончалеш -

Пырысым вел лач ужеш.

Пырыс тыште мом ышта?

Мо тыгае томаша?

Коля йӧршын ӧрмалген,

Куржын лекте, чон корштен.

Ончал колтыш тӱткынрак,

Волен шинче тушанак:

Йоча кашак, куанен,

Пырыс тупышто канен!

Тыгеракын ме пырля

Ой мучашке лишемна:

Пырыс муын шокшо суртым,

Коля-влак пуртеныт тудым!

Кеч манат: «Чыла йомак!

Лийын ок керт нигунам!»

Иктым раш умылыман:

Лач келшен вет илыман,

Икте-весым пагален,

Икте-весылан полшен,

Йӧсӧ годым - кутырен,

Йӱштӧ годым - ырыктен...