0 °С
Лум
Все новости
Конкурс!
10 Кылме 2019, 16:50
«Эй, такмакшат, такмакшат…»
Салам, чолманзе-влак!«Эй, такмакшат…» конкурсыш мыят уло кумылын ушнынем. Вет такмак - марий калыкын поянлыкше. Шоҥгырак-влак улмо годым поген кодыман. Нуно пытат, чыла поянлыкна вес тӱняш кая. Тыште Бирск районысо, Забельысе, 60 такмакым чумырымо.Салам дене Михаил ИЖБУЛДИН.Памаш ял, Бирск район. Памаш ямле, Памаш ямле, Памашын вӱдшӧ тамле. Памаш аул эрге-влакын Тошкал колтымышт ямле.
Памаш урем - кужу урем,
Мучыч-мучко ош куэ.
Ош куэште шӱшпык шӱшка,
Мыйын шинчавӱд йога.
Памаш урем - кужу урем,
Покшелныже мый шогем.
Ончен шогем, вучен шогем,
Йолташ (досем) толеш дыр, шонем.
Памаш воктен ужар шудым
Кӧн имньыже кочкеш гын?
Мыйын тошто досем дене
Кӧн ӱдыржӧ (эргыже) коштеш гын?
Лапкыш мийышыч, мом нальыч?
Кольялукым мош нальыч?
Памаш воктен коштмет годым
Мыйым молан шупшальыч?
Ямле памаш вӱдешыже
Эрден шӱргем мый мушкым.
Эрден шӱргӧ мушмо годым
Досем шонен магырышым.
Памаш воктен арамажым
Шадыртатен руэна.
Шокто, йолташ, музиканым,
Шадыртатен куштена.
Памаш вӱдшӧ келге маныт,
Кӧ волен ончен вара?
Мыйын йолташ сап-сай маныт,
Кӧ коштын ончен вара?
Ал лийме годым гына,
Гӱл лийме годым гына,
Нӧлталалтеш вет кӱмылна
Пырляна годым гына.
Алием-влак дене,
Гӱлием-влак дене,
Ончем-ончем да воштылам
Йолташем-влак дене.
Мием маньым - шыч намие,
Кодам маньым - шыч кодо.
Койышланен коштыч гынат,
Иктыланат шыч йӧрӧ.
Ала-молан пазарыште
Порсын тасма шергакан.
Ала-молан илышыште
Эпташемже шергакан.
Мурем гынат, еҥ колеш,
Шӱшкем гынат, еҥ колеш.
Еҥ колмеш, шочшем колжо,
Мурыде, чонем ок тӱсӧ.
Каем ынде, каем ынде,
Каем гын, ом тол ынде.
Ты мурем ден ты семемым
Ида мондо толмешкем.
Ош пеледыш вет пеледеш
Идалыклан кок гана.
Огеш лий вет рвезе илыш
Ӱмырыштӧ кок гана.
Кычкырал, такмакым луктам,
Нӧлталза, йолташ-влак!
Могай неле пагыт ок лий,
Аралыза, йолташ-влак!
Чаманем тӧрзасе гӱлым
Саргаен кошкымыжлан.
Чаманем рвезе ӱмырым
Вашке эртен кайымыжлан.
Йошкар тувыр ямле коеш
Аркаште, тӱредмаште.
Йолташ-влак, ида сыре
Такмак каласымаште.
Мемнан имне олян йорта,
Олян йорта - шӓп налеш.
Мемнан тыге пырля коштмо
Сагынен ойлаш кодеш.
Ӱпем вылга, ӱпем вылга,
Ӱпем вылга пурлашке.
Вӱдеш йоген каем ыле,
Вӱд ок його пурлашке.
Ӱстембалне кок чайгорка,
Иктыштыжат чай уке.
Эй, йолташем, тый укетлан
Ик верыштат ям уке.
Ломберышке пурышым -
Ломбо кичкыже уло.
Тыш ончальым, туш ончальым -
Шочшо укелан ям уке.
Ал лиймыжат шуэш дыр,
Гӱл лиймыжат шуэш дыр.
Шочмо-кушмо ялышкыже
Пӧртылмыжат шуэш дыр.
Ош кышамер ялукетым
Ынде пидаш тӱҥальым.
Рвезе ӱмыр эртымыжым
Ынде шижаш тӱҥальым.
Пӱкшым кочмет шуэш гын,
Поген ом пу, поген коч.
Моло ойлышаш мутем уке,
Ты мут дене умылен код.
Шем чодыран покшелныже
Шем кишке пӱтырналтын.
Пӱтырналтын да рончалтын,
Коштылтын да мондалтын.
Ӱлыл мучаш, кӱшыл мучаш -
Молан ямле ты мучаш?
Ямле лийде, могай лиеш -
Шочын-кушмо ты мучаш.
Имньым кичкен мый шым мошто,
Первый сапым пыштышым.
Дос лийшашетым шым пале,
Ойлышым да воштыльым.
Ал лий ыле тый, йолташ!
Гӱл лий ыле тый, йолташ!
Кудыр макын ал саскаже
Тыяк лий ыле, йолташ!
Чие, кудаш, ит лавыртыл
Замокан тувыретым.
Сере, йолташ, ит ӧркане,
Мыйым ит сагындаре.
Шиян ӱштем, ший аршашем
Чӱчкаш чияш ышталтын.
Мемнан шольо, тендан шӱжар
Мужыр лияш пуйыралтын.
Ӱкыдышкӧ пурышна да
Сайжым, сайжым руална.
Памашышке толнална да
Сай деч сайжым наҥгайна.
Трактор пасум куралеш,
Шырчык йылым кычалеш.
Йыл кычалше шырчык гае
Чонем тыйым кычалеш.
Сар шӱшпыкын сар игыже
«Акий, куш кает?» манеш.
Тӧрзам почеш да кычкыра,
«Шкетак улам!» манеш.
Саре-саре сар ӱпетым
Варвыр пӧрык шерам гыст.
Шӱмем тыйым пеш йӧрата,
Варвыр пӧрык коштам гыст.
Шуко мураш ок йӧрӧ,
Шуко кушташ ок йӧрӧ.
Шуко мурен, шуко шӱшкен,
Иктыланат от йӧрӧ.
Ай, изаем, тыйым шонем.
Тыйым шоныде, кӧм шонем.
Ош кагазеш первый корнеш
Тыйым серыде, кӧм серем.
Ошвич воктен шем шоптыржо
Молан кӱын огыл гын?
Кукулан кид, мылам шулдыр
Молан лийын огыл гын?
Шокто, изай, музиканым,
Тый семетым йӧратем.
Ойлыметым, воштылметым,
Шкендымат йӧратем.
Кӱшнӧ шӱдыр пешак шуко,
Шӧргаш лийын вочшо ыле.
Мыйын йолташ пеш мӱндырнӧ,
Шӱшпык лийын толжо ыле.
Тыге кошташ шонат гынат,
Туге ышташ шонат гынат,
Ай, йолташем, она ойгыро
Ойыраш шонат гынат.
Шокто, чӱчий, музиканым,
Тальянский семетым.
Тальянский семет дене
Каласена такмакым.
Кӱкшӧ курык вуйышкыжо
Кӱзена да волена.
Вич ияшлык планнажым
Ик ийыште темена.
Пӱрӧ (Бирск) кушто? Пӱрӧ кушто?
Пӱрӧ курык вуйышто.
Шуко шинчымет шуэш гын,
Пуро комсомолышко.
Мыйын йолташ айват ыле,
Шем пальтом чия ыле.
Мые сырен ончаламат,
Ойлен воштылеш ыле.
Мӱзиканын лукешыже
Ала теҥгем кыстырышыч?
«Йолташ!» манме йӱкет шоктыш,
Ала сагынен кычкырышыч?
Олма ужарге, лимо саре,
Помидоржо йошкарге.
Неле илышеш шочын-кушна,
Садлан ӱпна ошалге.
(Вуй ужарге, шоныш шуко,
Садлан ӱпна ошалге).
Алетат уло тыйын,
Гӱлетат уло тыйын.
Шопкер гычын шолышт толмо
Кӱзгетат уло тыйын.
(Шопкер - Бирск районысо ял.)
Ал пыштыде, гӱлым пыштен,
Ургыктат ончылакым.
Вӱд пыштыде, тулым пыштен,
Йӱлатат изи чоным.
Ошвич воктен зӓҥгӓр саскам
Кучаш ок лий - шалана.
Шочшо-влак, мӱндыр улыда,
Ужаш ок лий - шӱм йӱла.
Эрат мардеж, касат мардеж,
Молан мардеж ок чарне?
Кок шинчам тӧрзаште лиеш,
Толын кает - мо лиеш?
Сар шӱшпыкым ашнаш нальым,
Сайрашаш йӧрмешкыже.
Сагынена, саргаена,
Угыч пырля лиймешке.
Самолетшо куш кая?
Вертолетшо куш кая?
Дос ден кошташ тӱҥалат гын,
Уло шоныш куш кая?
Шке кужу, шке ямле
Ты Памашын уремже.
Ала вола - чонлан йӧсӧ,
Ты йолташын мӱндыржӧ.
Кӱкшӧ пӧртын тӧрзаштыже,
Шорыктын, язум серем.
Ит шорыктал, йолташ улат.
Каем гын, йотлан кодат.
Мемнан имне коя огыл,
Йолжо кандаше огыл.
Эй, эпташем, вучен иле:
Кум ий кандаше огыл.
Ош першаткан кӧргыштыжӧ
Ший шӧргашын шӓӱлӓже.
Эрат-касат мый шинчаштем
Ты моторын шӓӱлӓже.
Ош ялукын чокыжо
Кӱрышталташ тӱҥале.
Ала-молан таче кастен
Шӱмем йӱлаш тӱҥале.
Олыкышто ужар шудо
Кеҥеж юж ден шӱлалеш.
Сар шӱшпыкын шӱшкымыжӧ
Изи шӱмыш логалеш.
Ялна кечын вияҥеш,
Шинчам веле каралте:
Коммунизмыш кайышна да
Коремышке шуҥгалтна.
Читайте нас:
© 2024 «Чолман». Республиканская общественно-политическая газета на марийском языке. Издается с 24 апреля 1991 г.
Главный редактор - Губаев Игорь Иванович.
При использовании материалов гиперссылка на сайт cholman.info обязательна.
Категория информационной продукции 12+
Связь, информационный технологий да массовый коммуникаций сферым эскерыше Федеральный службын Башкортостан Республикысе Управленийже 2016 ий 11 июльышто ПИ ТУ02-01543 № дене регистрироватлен.
Мы в соцсетях:
ВКонтакте - vk.com/cholman
Telegram - https://t.me/cholmantv
Я.Дзен - https://dzen.ru/cholman
ОК - ok.ru/cholmanrb
TikTok - tiktok.com/@cholman.tv
Телефон
Телефон: 8(34783)7-07-97.
Электрон почто
Адрес
Адрес редакции, типографии: 452688, Республика Башкортостан, г. Нефтекамск, Березовское шоссе, 4А, 1 этаж.
Для писем: 452688, Республика Башкортостан, г. Нефтекамск, 8-е почтовое отделение, а/я 116, для редакции газеты «Чолман».