Пӧлек - мотор ӱдырлан куан

Кодшо арнян пӧлек шке озаж деке миен шуо. Кӧ тудо тугай? Мишкан селасе Ф. Буляков лӱмеш икымше лицейыште тунемше Юлия Шаркаевалан 16 тӱжем наре еҥ шке йӱкшым пуэн, да тудо сеҥышыш лектын. Ӱдыр сайын тунемеш, тыршышан, «Эрвел» куштышо калык ансамбльыш коштеш, тӱжвал тӱсшӧ да вургемже дене веле огыл, уш-акылже, койыш-шоктышыжлан кӧрат мотор улеш. Тидын нерген лицейын директоржо Е.В. Малмыгин, «Эрвел» ансамбльын вуйлатышыже И.Е. Имаева ӱдырлан пӧлекым кучыктымо годым ойлышт. А тунемше-влаклан уна-влакын поро шонымаш дене вучыдымын толын лекмышт пеш оҥай вашлиймаш семын эртыш, йолташ ӱдырыштын конкурсышто сеҥыме уверым куанен вашлийыч. «Чолман» газетын тӱҥ редакторжо И. Губаев Ю. Шаркаевалан феным пӧлеклыш, а пӧръеҥ-влак деч кумылаҥдыше призым кучыкташ ойым лукшо Калтаса районысо фермер озанлыкым вуйлатыше, ял озанлык шанче кандидат П. Петров шке мӱкшотарже гыч пеш тутло мӱй дене куандарыш.