Сай койышым нал

Верласе мер илышыште чолгалыкым ончыктышо еш-влаклан республикыште Еш, паша да калыкым социально аралыше министерство конкурсым эртара. Тудо 8 июль гыч 9 сентябрь марте шуйна. Конкурсышко ушнаш социальный полышым пуымо але шке кумылын моло поро пашам шуктымо нерген тыгай еш видео-, фотоматериалым иктаж-кудыштын социальный сетьысе лаштыкыштыже («Ютуб», «Инстаграмм», «ВКонтакте», «Фейсбук», «Одноклассники») #Берипример хештег дене вераҥдышаш, вара Башньюс сайтын тиде конкурс нерген лаштыкыштыже заявкым возыман да видеороликым вераҥдыме нерген ссылкым ончыктыман. Роликын хронометражше 60 секунд деч утларак шуйнышаш огыл.

Эн сай ешым Интернетыште, тыгак лӱмын ыштыме мер комиссийыште (Тудым РФ Президент пелен Йочан праважым аралыше уполномоченный Анна Кузнецова вуйлата.) калыкын кум этапыште йӱклымыж почеш ойырен налыт. Сеҥышылан пӧлек - автомобиль. Тудым налаш республика Вуйлык лӱм дене 600 теҥгеаш сертификатым Еш идалыкым иктешлыме мероприятийыште пуат.

Конкурсым эртарыме шотышто тичмаш уверым Башньюс сайтын лаштыкыштыже пален налаш лиеш.

И. ГУБАЕВ.