Кеҥежын мотор ӱдыржым тӱвыра фестивальыште ужын кертыда

Мотор деч моторым, сай деч сайжым ойырен налаш куштылго огыл. Йӱклышӧ влакын чотыштым, лудшо-влакын ойыштым, штатыште шогыдымо автор-влакын мер эксперт семын темлымыштым шотыш налын, кеҥежым эртарыме конкурснам иктешлышна, эн мотор ӱдыр-влакын лӱмышт дене таче палдарена. Икымше «тошкалтышыш» Бирск ола гыч Элеонора Ялитовам «шогалтышна». Кокымшо верым Валерия Салиева (Мишкан села) ден Евгения Кошкина (Йошкар-Ола) пайлышт. Кумшо вер дене кок ӱдырым - Диана Шуматбаевам (Тумерсола, Краснокам район) да Эльвира Кузнецовам (Йошкар-Ола) - палемдышна. Лина Афонькиналан (Музек, Краснокам район) да Злата Захаровалан (Монар, Мишкан район) жюри дене пырля кумылаҥдыше пӧлекым пуаш кутырен келшышна.

Конкурсышто сеҥыше ӱдыр-влак тӱс да кап-кыл дене гына огыл мотор улыт, чонышт да интеллектуальный кӱкшытышт денат кумылым савырат. Тунеммаште, пашаште, мер толкынышто але спортышто - кажныже шке верыштыже моштымашыже, мастарлыкше да чулымлыкшо дене калыкнан лӱмжым нӧлтен шога.

Сеҥыше-влаклан дипломым да пӧлекым 1 декабрьыште Нефтекамскысе тўвыра рӱдерыште кучыктена. Лач ты кечын, кугарня кастене, Марий тӱвыра тылзым мучашлыме лӱмеш поро йӱлаш савырныше Регион-влак кокласе марий фестиваль лиеш. Пайрем касыште мотор ӱдыр-влакым гына огыл, калыкнам чапландарыше моло чолга марий ден ӱдырамаш-влакымат палемдена, эн мотор марий вургемым чийыше да кидмастар-влаклан конкурсым эртарена, мутат уке, туштак «Чолман» газетлан возалтше-влаклан шергакан пӧлекым модын налаш йӧным ыштена. Кугу концертыш билетым налаш вараш кодшо-влаклан ончылгоч шижтарена: фестивальлан стартым пуымо, газетым лудшо-влак уверым пален налыт да редакцийышкак толын наледат. Кӧ ок пале гын, ушештарена: спринтыште ӱлыш старт гыч тарваныше лап лияш але уке манын шоген кодшым кеч-кунамат ончылта.

И. ГУБАЕВ.