Илыш дене тєр ошкылман

17-18 ноябрьыште Нефтекамск оласе интернат-школышто «Коррекционный педагог - 2016» конкурсын зональный этапше эртыш. Тушто Нефтекамск, Бирск, Янаул да Илиш коррекционный интернатлаште пашам ыштыше туныктышо да воспитатель-влак шке вийыштым тергышт.

Конкурсыш толшо-влакым образований Нефтекамск оласе управлений вуйлыкын алмаштышыже Р.И. Гафуров, профком председатель И.Т. Файрушина саламлышт. Конкурсант-влак туныктымаште у, инновационный метод-влакым ончыкташ тыршеныт, эртарыме урокым грамотно иктешленыт, лончыленыт. Тыгак жюри портфолио-влакым - папкыш чумырымо документыштым - аклен. Мастарлык конкурсышто туныктышо ден воспитатель-влаклан психолого-педагогический ситуацийым решатлаш, педагогический сеҥымашыштын формулжым почын пуаш кӱлын.

«Идалыкын туныктышыжо - 2016» зональный конкурсышто Нефтекамск оласе интернат-школын тӱҥалтыш класслаште туныктышыжо Э. Мансурова, «Идалыкын воспитательже - 2016» конкурсышто ты школ гычак Л.З. Кашфуллина сеҥышыш лектыч. Декабрь тылзыште нуно республикыште эртарыме «Коррекционный педагог - 2016» конкурсышто шке вийыштым тергышаш улыт.

Нефтекамск оласе коррекционный интернат-школын директоржо З.А. Хабибуллина участник-влакым сеҥымаш дене шокшын саламлыш. «Зональный конкурс ончыч эре Бирскыште эрта ыле. Тений уна-влакым Нефтекамскысе интернат-школ вашлие. Тыгай конкурс моткоч кӱлешан - туныктышо да воспитатель-влак икте-весыштын опытышт дене палыме лийыт, ончыкылан вий-куатым поген каят. Коррекционный школлаште ФГОС - Федеральный кугыжаныш образовательный стандарт почеш пашам ышташ тӱҥалме. Илыш туныктышо да воспитатель-влак деч жап дене тӧр ошкылаш йодеш», - каласыш Зифина Абсаховна.

Интернат-школысо туныктышо ден тунемше-влакат шке мастарлыкыштым уло кумылын ончыктышт. Конкурсант-влаклан мурым да куштымашым пӧлеклышт.