Кеҥежлан икмыняр каҥаш

Вӱдыштӧ тӱткӧ лийза

Кече пелтыме годым эҥерыште але ерыште чывылталт лекме шуэш. Но шарныман - чыла вере йӱштылаш огеш лий: вӱдыштӧ паразит, стафилококк-влак «илен», пундыш, вӱдкашка-влак лийын кертыт.

Тыгай лӱдыкшӧ ынже вашлиялт манын, кажне кеҥежым верысе администраций йӱштылмӧ верлам келыштара, санитарный врач-влак вӱдын да ошман могай улмыжым шымлат да вара гына йӱштылаш лийме шотышто пунчалым луктыт. Тыге тений республикыште 150 пляжым почыт. 

ШАРНЫЗА! Йӱшывуя ида йӱштыл, икшывым вӱд воктен шкетшым ида кодо, сер деч чот торашке ийын ида кай - шке вийдам аклыза.

Изи икшыве уло гын, окнам петырыман

Суртышто изи икшыве уло гын, окнам почын кодаш лӱдыкшӧ. Йоча-влакын, москитный сеткыш эҥертен, окна гыч лектын вочмышт нерген чӱчкыдын колына. Кугыеҥын ик-кок секундлан савырныме жапыштак туткар лийын каен кертеш, садлан окна тӱкылалтын але кӱшкыла почылтын да сравоч дене фиксироватлалтын лийшаш.

Тулым ида ылыжте

Башкортостаныште 17 апрель гыч пожар ваштареш кучедалме режимым увертарыме. Шокшо, мардежан кече годым ойып гычат тул пижын кертеш, садлан кызыт чодыраште тулым ылыжташ гына огыл, тушко кошташ, шӱкшакым йӱлаташ да тулеш кочкышым ямдылаш чарыме. Правилым пудыртышо-влаклан 50 тӱжем теҥге марте, айдемылан кӧра чодыраште пожар лийын гын, 60 тӱжем теҥге марте штрафым, ты шотыштак юридический лица-влаклан 1 миллион да 2 миллион теҥге марте штрафым тӱлыктен кертыт.

ШАРНЫЗА! Чодыраште пожарым ужыда гын, Чодыра озанлык министерствын йӱдшӧ-кечыже пашам ыштыше диспетчер службышкыжо 8-347-218-14-14 телефон дене але чодыра охранын вияш линийышкыже 8-800-100-94-00 телефон дене йыҥгыртен каласыза.   

Коля да пудий деч шекланыза

Коля йӱштымужо дене дачысе пӧртым эрыктыме, пӱртӱс лоҥгаште каныме але поҥгым да емыжым погымо годым черланаш лиеш. Аралалташ манын, пӧртым эрыктыме да шудым шалатыме годым умша ден нерым марле повязке дене петырыза. Пӱртӱс лоҥгаш мийыме годым кочкышдам пундышыш да шудыш ида опто, киддам мушкаш ида мондо, шудым ида пурышт. Пудий ынже пызне манын, репеллент дене пайдаланыза, кужу шокшан да эҥырашан вургемым чийыза, вуеш шовычым пидса, жапын-жапын кап-кылдам тергыза.

Кочкыш-йӱыш свежа лийшаш

Кеҥежым кочкыш-йӱыш вашке пужлен да кишечный инфекций мартеат шуктен кертеш. Кочкышым сайлен налман, тӱсым, пушым, аралыме срокым тергыман, чын аралыман да сайын кӱктыман. Шӧр йӧрвар, полуфабрикат шыл, сок, салат, торт да пирожный-влакым налме годым поснак тӱткӧ лийман. Стрит-фудым, левыше мороженыйым налшаш уке. Пакчасаскам да фруктым мушде ида коч, икшывылан пуэда гын, шокшо вӱд дене шӱалтыза.

Сусыр але удыралме пале уло гын 

Кеҥежым эсогыл удыралме пале телымсе деч эркынрак илана. Тушко инфекций ынже логал, вашкерак тӧрланыже манын, вӱд дене шӱалтыман да антисептикым шӱрыман. Йодым але зеленкым сусыр ӱмбак огыл, йырже гына йыгалтыман. Сусырда келге, тушко лавыра логалын гын, врач дек кайыза.