Кеҥеж мо дене шарнаш кодын?

Л. ИПУЛАЕВА. Шопкер ял, Караидель район:

Тенийсе кеҥеж мылам шуко куаным кондыш. Эн тӱҥжӧ - Марий кугыжаныш университетым тунем пытаренам да «Опора Республики Марий Эл» премийыште сеҥышыш лектынам. Тыгак мылам X Марий самырыктукым слетышто лияш пиал логалын.

А. ЗАХАРОВА. Мишкан ял, Балтач район:

Ах, могае сай, туныктышын отпускшо кужу. Оксат веле ситыже! Самолёт шерге, поезд шуко жапым налеш, а «Бла-бла-кар» дене, шонет - канет, вӱд воктек шуат - йӱштылат, ноет - унагудышко пурен канет, шужет - кафеш пурен кочкат.

Кужу корным шурнан пасу, шудан, сылне пеледышан кумда олык, чолгыж кийыше ший эҥер кӱчыкемдат. Шижынат от шукто - Крымыштат лият! Пляж, Шем теҥыз вӱд да яндар юж, курык-влак, тутло пакчасаска, сылне деч сылне пеледыш-влак да пайдале лавыражат кумылым нӧлтеныт. Кажне ола шке семынже мотор, сылне. Мыланем Алушта, Ялта, Алупка, Симферополь да Севастополь олалаште да Рыбачье, Малореченское, Солнечногорское поселкылаште лияш пиал шыргыжале. Икманаш, книгаште лудмо да шке шинча ден ужмо икте огыл. Тусо кундемыште илыше калыкын порылыкшо ушешем кодын. Эре умыландарат, полшат, сийлат, унала ӱжыт.

И. БАЙМУЛИНА. Бирск ола:

Тиде кеҥеж тудым ава семын вашлийме дене ушеш кодеш. Тиде пиалым шуко ий гыч вучен шуктымек, чонышто куан тул ила. А тыглайже кеҥеж моло ийласе деч вараш толмыж дене ойыртемалте. Ава-ачан садыштышт олмапунат моло ий деч варарак олмам шукта.

В. МУСТАЕВА. Йошкар-Ола, Марий Эл:

Кажне кече шкешотан, тыгак кажне кеҥежынат шке сылнылыкше да ойыртемже уло. 2018-ше ийысе кеҥеж эн ондак дипломым налме дене шарнымашеш кодеш. Мый марий ден финн йылме туныктышо улам. Вес кугу событий - «Кугарня» газет редакцийыш пашаш пуренам. Ынде кок пашам уло (весыже - Марий Эл Радио). Тений тыгак Марий самырыктукым слетыш миенам. Молгунам организатор семын коштынам гын, тений участник семын шуаралтынам. Тушто чолга самырык-влак дене палыме лийынам. Тыгак тений Крым Республикыште эртыше «Таврида» форумышто лияш пиал шыргыжалын. Тушто ик арня жап моткоч писын да пайдалын эртыш. Шукерте огыл лийше эше ик событий - икымше гана кугу сценыш лектым. Марий Эл Радион 13 ияш лӱмгечыжлан пӧлеклалтше концертыште вӱдышӧ лийынам. Ончылно эше пел тылзе, тудо эше у шарнымашым кода манын ӱшанем.

Л. ШАВАЛИЕВА йодыштын.