«Стартыште» «Чолман» дене пырля весела

Тудым вожатый-влак Наталья Леонова да Диана Сайпушева ямдыленыт. Шукырак ӱдыр-рвезым авалташ манын, писын гына кандаш еҥан кум командым чумырен шогалтышт. Кажныже шкаланже лӱмым ойырыш, эмблемым сӱретлыш. Теве «Президент» (Ты лӱмжӧ уке гычак шочын огыл улмаш, капитанышт Кирилл Алиев Чорай школын командыж дене Всероссийский «Президент состязанийын» финалыштыже таҥасен.), «Спартак» да «Танк-влак» куштылго огыл ӱчашымашыш ушнышт. Таҥасымашыже, чынак, пеш веселан эртыш. Тӱрлӧ ийготан икшыве-влак кандырам шупшыч, куржтальыч, тӧрштыльыч, куштышт, воштыльыч…

Ӧрдыж гыч эскерашат оҥай ыле. «Весела старт» тӱҥалтыште команда-влак вигак вуйге модмашке пурен кайышт гын, ончышо-влак йокрокланымыла койыч. Но уста вожатый-влак нуным писын ылыжтышт.

Шыпланымыштым шижын, кугурак вожатый Валентина Янгуатова тыманмеш весела модышым эртарен нале, варарак лагерьыште каныше ӱдыр-влак весела сем почеш чылаштым кушталташ ӱжыч.

«Кирилл! Кирилл! Ксюша! Радмир!» - кычкырат йоча-влак. Кажныже тудлан келшыше команда ончык лекше манын шона. Командыш ушнышо-влакат вий пыштенак тыршышт. «Танк-влак» чылам ончылтышт, жюри «Президентлан» кокымшо да «Спартаклан» кумшо верым пуыш. Нунылан пӧлекым: мече-вла-

кым, шашкым да молым - «Чолман» газет редакций ямдылен ыле. Ӱдыр-рвезе-вла-кым сеҥымаш дене газетын тӱҥ редакторжо И.И. Губаев да

лагерь вуйлатыше Р.Ш. Шайбаков саламлышт, самырык тукымлан таза, виян, писе да чулым лийын кушкаш тыланышт. Кӧ деч примерым налаш лиймымат шижтарышт. «Тиде лагерьыште йочашт годым Кульчубай ялын шочшыжо, генерал Вячеслав Шамиев, Монар гыч паралимпийский чемпион-влак Кирилл Михайлов, Ростислав Павлов каненыт да шуаралтыныт. Эсогыл лагерьыште лийме фотоштат аралалт кодын», - каласкалыш Родион Шагиевич.

Таҥасымаш деч вара вийым погалташ йоча-влак столовыйыш куржыч. Тушто Наталья Салмиярован вуйлатыме повар тӱшка нунылан тутло сийым ямдылен ыле. Ик жап гыч рвезе-влак пӧлекымат кутлаш лектыч, вет смена мучаш марте тыршымаш дене сулен налме мече дене модын шуктыман...

«Старт» лагерьыште тӱҥ шотышто Мишкан, тыгак Кушнаренко район гыч 90 наре икшывым ушышо социальный смена оҥайын эртен, шонена. Кеҥеж каныш шарнаш кодшо манын, самырык вожатый, воспитатель-влак да моло персонал - Башкир кугыжаныш университетын Бирск филиалжын да тудын пеленсе колледжын икоян студентышт тыршеныт. А вес смена спортлан шӱман йоча-влакым уша, тушко тренер-влакат мият.

Мишкан район.