Йочан кечыжым пайремлышт

Йоча-влакын кеҥеж канышышт толын шуо. Икымше кечынак школышто нунын лӱмеш пайремым эртараш ямдылалтыч: залым сӧрастарышт, весела семым чӱктышт. Йоча-влак, мотор вургемым чиен, школыш погынышт. Нуным поро туныктышо-влак вашлийыч.

Пайремым йоча муро дене почыч. «Детство», «Пусть всегда будет солнце» муро-влакым чылан палат, садлан эше тунемаш коштдымо икшыве-влакат пырля муралтышт. Тӱҥалтыш классыште тунемше-влак кеҥеж нерген почеламут-влакым каласкален пуышт. Вара йомакым палымыштым ончыктышт: туныктышо тӱрлӧ йомак гыч ужашым лудо, а икшыве-влак тӱшкан вашештышт. Изирак-влакат йомакым сайын палат улмаш.

Весела модмашлан кок командылан шелалтыч, школыш коштдымо йоча-влакымат ушышт. Тӱрлӧ модыш дене модын, кандырам шупшын таҥасен, кажныже шке сеҥымашыжлан куаныш. Пӧлекшат чылаштлан ситыш.

Йоча-влаклан тыгай сай пайремым туныктышо-влак Е.В. Бикмасова, Э.М. Имучаева, Н.М. Сулейманова, М.И. Янибекова ямдыленыт.

Д. АПЛЕКАЕВА.

Ӱткӱстӧ школ, Караидель район.