+21 °С
Облачно
Каналтыме годым
24 Июля , 05:00
Ыштыш-кучышлан изинек тунемман
Лу ияш уныкам Аэлита ИВАНАЕВА йолташ ӱдыржӧ-влак дене пырля тӱрлӧ кочкышым ямдылаш кумылан. Духовкыжым гына шке эскерем. Таче лудшо-влакым уныкамын кӱэштме «Бонна» пиццын (марлаже «Колбаса да сыр эгерче» манаш келша, очыни) рецепше дене палдарем.
Авторын фотожо.
Кӱлеш: 350 г ош ложаш, 200 мл шӧр, 1 муно, 10 г кукшо дрожжа, ик кугу совла сакыр, чывыштыш шинчал, 50 г ушкал ӱй. Чыла пырля луген, руашым нӧштылман да кугу мелна гай шарыман.
Соусым да майонезым, пырля йӧрен, мелнаш йыгалтыман. Колбаса ден сырым (кӧлан мыняре кӱлеш, тунар пышта) терка гоч колтыман, соус ден майонез ӱмбаке иктӧр оптыман. Чыла тидым рулет гай пӱтырыман да шӱртӧ дене моторын гына пӱчкедыман. Тышеч изи «мелна-влак» лийыт. Нуным, ӱйлен, ямдылыме салмаш оптыман да ӱмбакышт муноптемым шӱрыман, ончылгоч ырыктен ямдылыме духовкыш шындыман.
Тутло кочкыш ямде! Тамле чайым темалтен, ӱстелтӧрыш шич веле. Мыламат, ковалан, тиде кугу полыш: «Кечывал кочкышлан мом ямдылаш?» манын, вуйым пудыртылшаш уке.
