-16 °С
Лум
Все новости
Каналтыме годым
26 Сорла 2025, 11:03
Арбуз - ӱстелыште вучымо сий
Кызыт пазарыште, кевытыште яшлыклаште кечывалвел унам - арбузым - лыҥ ужалат. Шокшо вер-шӧрыштӧ кушшо, ужар мечым ушештарыше йыргешке фрукт кажным сымыстара - шкенжым тамлен ончаш «тарата». Тыгодым мондыман огыл: арбузат тӱрлӧ лиеш. Тудым кузе чын ойырыман, мом шотыш налман? Роспотребнадзорын пашаеҥже-влак тидын шотышто икмыняр каҥашым ушышто кучаш темлат:
Авторын фотожо.
Емыжым санкционироватлыме ужалыме верла гыч налаш йӧнан, ужалышын кӱлеш документше-влакат шотышто лийшаш улыт. Арбуз мландыште кийышаш огыл. Корно воктене ужалыме арбузым налме ок кӱл: нуно кӧргышкышт эртен кайыше автомашина-влакын южыш лукмо неле металл-влакым шыҥдарат.
Тамлен ончалашлан арбузын изи ужашыжым пӱчкын ончалаш, тыгак тичмаш арбузым ужаш-влаклан шеледаш ок кӱл: пӱчмӧ верыште уда микроорганизм-влак писын шарлат.
Сай, шушо арбузын шӱмжӧ шыма, йылгыжше, «корныжо-влак» раш койыт, якте чиян улыт. Шӱмыштыжӧ коркалыме, удыркалыме пале лийшаш огыл. Шушо арбузын «почшо» кукшо. Кид дене перыме годым тыгай арбуз раш, оҥгыр гай йӱкым луктеш.
Шушо арбузым шӱмыштыжӧ улшо сар пале (мландыште кийыме верже) палдара: тудыжо кечеш ок кӱй.
Арбузым кугумат, изимат огыл - кокла кугытаным (5 кг наре) ойырыман.
Пӱчмӧ деч ончыч арбузым кок гана: ондак лавыра ден пуракшым кораҥдаш тыглай вӱд дене, вара шовынан леве вӱд дене - мушман, молан манаш гын шӱмышкыжӧ пижше пурак, мланде, уда микроорганизм, арбуз кӧргыш логалмеке, шарлат да кишечный инфекций марте шуктен кертыт.
Пӱчмӧ арбузым холодильникыште аралыман.
Арбуз - тамле веле огыл, эше моткоч пайдале фрукт. Тудо А, В, С витаминлан, магний, калий, кальций, фосфор, железо, натрий да моло микроэлементлан поян. Арбуз организм гыч уто холестериным луктеш, антиоксидант улеш, иммунитетым саемда.
Новости партнеров