Окрошкым ямдылена

Кефир дене

Кӱлеш: 500 г шолтымо шыл, 3-4 пареҥге, 3 свежа кияр, 2 муно, 1 л квас але кефир, 200 г шӧр але йогурт, 1 шоган, пел стакан тыгыдемдыме укроп але кинза, шинчал да шем пурыс, лимон. 

Шылым, шолтен, изирак ужаш-влаклан пӱчкедыман. Пареҥгым, муным шолтыман, кубик гай тыгыдемдыман. Свежа киярым пел оҥго семын, а шоганым тыгыдын пӱчкедыман. Кугу мискеш квасым але кефирым шӧр але йогурт дене йӧрыман. Тушко пӱчкедыме пакчасаскам пыштыман. Окрошкыш изишак шинчалым, пурысым ешарыман. Кӧн кумылжо уло, ямде шӱрыш лимон сокым але олма уксусым ешарен кертеш. Окрошкым ик жаплан холодильникыш вераҥдыман. Кочмо деч ончыч свежа ужар укроп дене сӧрастарыман.

Квас дене

Кӱлеш: 500 г пареҥге, 3 муно, 200 г редис, 300 г свежа кияр, 30 г ужар шоган, 15 г укроп, 15 г петрушка, 300 г колбаса, 1,5 л квас, 200 г ӱмбал, шинчал, шем пурыс. 

Пареҥгым 15-20 минут шӱмжыге шолтыман. Муным 10 минут кӱктыман да эрыктыман. Мушмо редисым оҥго, свежа киярым пел оҥго семын пӱчкедыман. Ужар шоганым, укропым да петрушкым тыгыдемдыман. Колбасам кубик семын пӱчкедыман. Редисым, киярым, ужар кушкылым да колбасам келге кастрюльыш пыштыман. Пареҥге ден муным изирак кубик гай пӱчкедыман. Нунымат мискыш кудалтыман. Шинчалым, пурысым ешарен, чыла сайын пудыратыман. Тышке йӱштӧ квасым опталман. Окрошкым келге тарелкылаш пыштыман да кажнышкыже ӱмбалым ешарыман. 

Пайдале каҥаш: окрошкыш нӱжымӧ хреным але совла горчицым ешараш гын, тудо кочкышлан эшеат ойыртемалтше тамым пурта.

Минеральный вӱд дене

Кӱлеш: 400 г пареҥге, 3 муно, 300 г свежа кияр, 300 г редис, 150 г колбаса, 100 г ветчина, 50 г ужар шоган, 30 г укроп, 10 л минеральный вӱд, 100 г ӱмбал (10 процентан), 500 мл кефир, шем пурыс, шинчал. 

Пареҥгым, муным шолтыман. Йӱкшымекышт, нуным, тыгак киярым, колбаса ден ветчинам кубик семын, редисым вичкыжын да кужун пӱчкедыман, ужар шоган ден укропым тыгыдемдыман. Чыла тидым кугу мискыш пыштыман. Посна атыш йӱштӧ минеральный вӱдым опталман, тушко ӱмбал ден кефирым ешарыман, венчик дене пудыратыман. Тидым окрошкын ингредиентше-влакым пыштыме келге мискыш опталман. Шинчалым, пурысым ешарен, сайын гына пудыратыман. Мискым петыртыш дене леведман да 30 минутлан холодильникыш шындыман. Окрошкым тарелкылаш пыштыме годым тудым ужар кушкыл лышташ дене ешарен сӧрастараш лиеш.