Сӱрет мо нерген ойла?

Мутлан, айдемым сӱретледа гын, тудын кугытшым ончалза. Изи айдеме еҥын вийдыме, йодмым шукташ, мутым кучаш лӱдмыж нерген ойла. Тоя-влак дене ончыктымо айдеме шылаш, петыралташ тыршыме кумылым ончыкта. Сӱретыште айдеме тура онча гын, еҥ шкежат виш чонан, ойласаш кумылан улеш, вуйжым савырен - тугеже, ала-мо деч лӱдеш, тургыжлана, ойласаш кумылжо уке. Кугу вуян айдемым шонкален илыше, изи вуяным шонкалаш кумылдымо еҥ сӱретла. Корно-влак раш огытыл гын, вожылыда але нелын шонышо улыда. Шӱргым раш да причёскым ончыктеда - тӱжвал сындам ончыл верыш шындеда, еҥын тендан нерген мом шонымыжым тӱҥлан шотледа. Сӱретысе еҥ шинчажым кумен - тугеже, илышыштыда южо насталан шинчам петыраш, уждымыла кояш тыршеда. Кугу пылышан - еҥ мутым шотыш налыда, критикым чытен огыда керт. Пылышдыме - еҥ мутым огыда колышт. Топката кап-кыл - шкем кугуэш, виянеш ужыда да озала чучыда. Изи капан - нелын шонеда. Пӱгыр кап-кыл кумылдымо, мом ышташ палыдыме, титакан улмым ончыкта. Киддыме - еҥ дене ойласаш кумыл уке, ыреслыме - петыралтме, ваштареш улмо нерген, кок велкат шала - шкем кучен кертдыме нерген каласат. Кидым луш колтымо, кидкопа почылтын гын, айдеме мутланаш кумылан. Кужу йолан - еҥын эскерымыж деч кораҥаш тыршыме, эрыкан лияш да куржаш кумылан улмо нерген ойла. Кӱчык йолан - вожылмо, йӧндымын чучмо нерген. Кидпалыдам середа - шкендам йӧратеда. Квадратым, треугольникым да моло геометрический фигурым ӱскырт, раш илыш позициян, пеҥгыде, тӱткӧ еҥ коркала. Оҥго да йыргешке-влак вий шутымо, тичмашлык, пашам мучашлыме нерген ойлат. Нуно икте-весышт дене кылдалтыныт гын, шке велкыда савырыктынеда. Осал янлыкым (пирым, тигрым) шыде чонан, мераҥым, урым полышым, аралтышым вучышо, рывыжым чоярак, левым шкаланже акым палыше еҥ сӱретлат. Спиральым, тӱрлӧ кадыр-кудырым, оҥгым сӱретлышын чоныштыжо тӱтан озалана, еҥын проблемыжым решатлаш жапше уке. Кӱшкӧ ончыктышо стрелка моло еҥ-влакым ончен, кӱшкӧ кӱзаш, ӱлыкӧ стрелка - вий пытымым, шолашке - эртыше жапеш шогалмым, пурлашке - ончыко ончымо нерген ойлат. Ойыртемалташ, рӱдӧ верыште лияш кумылан еҥ шӱдырым сӱретла. Кечым, пеледышым, пыл лапчыкым илышлан куаныше-влак сӱретлат. Тыгай сӱрет еҥлан шокшо але тӱткылык ситыдыме нергенат шижтарен кертеш. Ыресым титакшым шижше але тургыжланыше сӱретла. Чылажат шке верыштыже лийже манын тыршыше кумылан пӧртым але коробкым ончыкта, шахмат полям вашмутым муын кертдыме еҥ ончыкта. Мӱкш караш ласкалыкым, тыныслыкым кычалме нерген ойла. Тиде чӱчкыдын вашлиялтше сӱрет-влакым лудын, теат шке кумылдам умылен кертыда.