Мо тугае топиарий?

Телым, У ий вашеш, суртышто телымсе топиарийым вераҥдаш келшен толеш. Кумыл лийме годым тудым шке кид дене ямдылаш кугу нелылыкше уке, тӱҥжӧ - кид йымалне кӱлеш материал лийже. Фотосо гай у ий топиарийым ышташ мотор кӧршӧк, гипс, оҥай форман пу але пластик тоя, 15-17 диаметран пенопласт шар (шарым газет да шӱртӧ гычат келыштараш лиеш), клей (кызыт шокшо клей-пистолет дене пайдаланат), сизаль, кожыш сакалыме тӱрлӧ тӱсан шарик, пӱгыльмӧ, «пушеҥге вурго» йыр пӱтыраш атлас тасма, искусственный изи кож укш пырче-влак кӱлыт.  

Тоям лента дене пӱтырен, атеш вераҥдена. Тушко вӱд дене йӧрымӧ гипсым опталына. Гипс кошкымеке, тудым ош салфетка але сизаль дене декорироватлена. Тоян вес мучашкыже пенопласт шарым «чиктена» але клей дене пижыктена. Шар йымалан бантик семын мотор лентым кылдаш лиеш. Ынде пушеҥгым моторландарена: клей дене шар модыш-влакым пижыктена, коклашкышт изи кож укш пырчым, пӱгыльмым але чонлан келшыше сӧрал арверым вераҥдена.