Слива варене

Сливым, мушкын, пелыгыч пӱчкедыман, тушыжым налман. Кӱжгӧ пундашан сотейникеш, кастрюлеш але казанеш лончо дене сакыр дене йӧрен пыштыман, рӱзалтыман. Тыге слива сокшым писынрак колта. Кок-кум шагатлан кодыман. Ты жапыште банкым да петыртыш-влакым стерилизоватлен ямдылаш лиеш.

Сливым изи тулыш шолташ шындыман. Жапын-жапын эркын пудыратыман. Шолаш пурымеке, вич минут кучыман да тул гыч налман. Шокшо вареньым кукшо банкылаш темкалыман да, петыркален, унчыливуя савыркален шындыман, шокшо шовыч дене леведман.