Тугак пашаш коштам

Ик кечын мыят кугу кевытыш логальым. Ончем, ик лукышто кужу гына черет. «Пайремлан икрам налыт докан», - шонем семынем. Чытен шым керт, ончаш кайышым. Миен шуым гын, ӧрым. Чылан кокыт-кумыт дене лотерей билетым налыт. Еҥ-влак налыт гын, мыят налшаш! Трук шуко оксам модын налам да вара пашашкат кошташ ом тӱҥал? Тыге шонкален, черет мый декем толын шуо. Намыс келге - мыят ныл билетым ниялтышым. 

Лотерей дене модмо кече толын шуо. Икшывем-влакым уремыш ужатышым да телевизор ончылно диванеш сайынак верланышым - ала миллионым модын налам. Икте почеш весым луктыт, мешакыште «бочонок-влакат» шагалемыч, да модышат пытыш. А мыйын билетыште ала-мыняр цифр удыралалтде кодо. Кеч билет акым модын налам ыле, уке. Тачат пашаш коштам…