Марий ӱдыр чылалан уста

- Надежда, изи марий курчак-влакым ышташ шонымаш кузе тендам авалтен?

- Интернетын ик лаштыкыштыже мамык гыч ыштыме модыш-влакым ужым, вигак кумылем савырышт, йӧратен шындышым. Марий ӱдыр улам, марий ялеш шочын-кушкынам, калыкем, тӱвыраже, йӱлаж дене кугешнем. Садлан курчакем-влаклан марий вургемым «чикташ» шонен пыштышым. 

- Надежда, вигак марий сынан курчак-влакым ышташ тӱҥалында?

- Уке. Икымше пашам - ӱдыремлан модашыже шкеж гай сынан, теле вургеман курчакым ыштышым. Мамык гыч модышым нылымше ий, марий сынан-влакым ик ий ончыч веле ышташ «кӱын» шуым.

- Курчак-влакым ышташ могай материалым кучылтыда? Кузе нуным ыштеда?

- Ончыч чӧп гыч курчак гай формым ыштем. Вара клейстерым ямдылем, интернетыште крахмал, ложаш, ПВА клей гыч ыштыме шуко рецепт уло. Мамыкым нӧртен, курчакым погем, формым пуэм, ик кече кошкымеке, чиялтем. Шокшышто кошташ ок лий, мамык чот купчырга.

- У курчак-влакым ышташ кумылда кузе лектеш?

- Ончыч ужмо сӱретыште могай узор, орнамент келша, тудым ыштем ыле. Кызыт вуйышто образ шочеш. Мутлан, кидышкышт мелнам, олмам кучыктем. Пытартыш пашаштем комбым але чывым ӧндалыктышым.

- Те курчакым гына огыл, марий сынан брелок-влакымат ыштеда. Молан лач нуным?

- Мӧҥгыштӧ йоча дене шинчыме годым эн ончыч марий сынан брелок-влакым ышташ тӱҥальым. Брелок-влак кевытыште шуко улыт, но марий узораным муаш йӧсырак.

Ожно ӱдыр икшыве-влакын икымше модышышт курчак лийын. Кована, авана-влак тудын дене модыныт. Кевытыште кызыт йоча-влаклан шуко тӱрлӧ модыш уло гынат, курчак садак чонлан лишыл.