Мӱкш пӱшкылеш гын, мӱй тамлырак лиеш

Тыге мӱкш дене кучедалме жапыштем пошкудо ялыш шочмо кечыш каяш логале. Йолем мӱкш пӱшкылмылан кӧра пуалынат, туфльым чияш ыш лий, кугу калош веле пурыш. Кид Нӧнчык патырын гай, шинча ишалтын, шӱргӧ лӧчен - ӱстел коклаште эрвел кучедалше гай шинчем. Эстрада артист улам мо - унала толшо-влак мыйым гына ончат да семынышт шыргыжалыт. Келшенам, коеш. А мый, тыгай тӱткылыклан тунемын омылат, изишак аптыраненам. Артист огыл, мӱкшызӧ лийнем вет. Вожылынрак, вуйым нӧлталде, чытенак шинчем.

Пӧръеҥ-влак ӱстел кокла гыч оралтыш тамак шупшаш лекташ тӱҥальычат, ласканрак шӱлалтышым. Пеленышт лектым, тамакым шупшмаш уке гынат, шогылтам, мыскараштлан вашештем. Воктекем суртоза лишеме. 

- Мӱкшым ончаш тӱҥалынат улмаш, ваш-ваш пеш йӧратеда ала мо? - ыштале. 

- Да, мыят еҥ деч уда омыл, тӧчен ончем, - вожылынрак вашештышым.

Кызыт тыгай чурий дене нигуш ом лек ыле, да мом ыштет, мыланна уш эре варарак пура вет. 

- Тыйын кидет-йолет, шӱргет пуал пытеныт, а мыйым молан дыр мӱкш огеш пӱшкыл. Ончал, пошкудын пакчаштыже мыняр омарта уло. Воктечышт чара могырын эртен коштам гынат, огыт пӱшкыл, - мыйым чаманен ойла оза. 

- Да, - манам, - арамлан тракторист лийынат, тылат мӱкшызӧ профессий лач гына келша ыле. Кумышто мӱйым кӱзем, мӱй кочкаш мийыза, - ӱжым. 

- А мо, миенат шуына, - вашештыш. 

Саламлымашым, мурымаш-куштымашым чытенак шинчен, чеверласен, пелашем дене мӧҥгӧ пӧртыл кайышна... 

Кумшешыжым, омартам почын, мӱй рама-влакым налмем годым автомашина толын шогале, родем, оралтыш пурен, мыйын велыш тарваныш. Омартам петырен, вашлияш ошкыльым. Тидым-тудым шонымашат уке, вет тудым мӱкш ок пӱшкыл. Иктаж кум-ныл метр толын шуде, кенета кидшым лупшкедылаш тӱҥале, ой-ой да ой-ой кычкырен, вашке гына пӧртӧнчык пурен йомо. 

Маскым кудашын, мыят пурышым. Ончем, унанан нерже йошкарген, корштымылан шинчавӱдшат лектын. 

- Мӱкшет-влак чынак осал улыт улмаш, а мыланем огыт логал манын шонем ыле, - шыргыжалаш тӧча. 

- Тый корнышто тамакым шупшынат дыр, садлан пушыжлан сыреныт, - нерым пӱшкылмышт годым кузе корштымым палемат, тудым изишак лыпландарынем.

Пошкудыжын Карпат урлык мӱкш улмыжым шым ойло. Свежа мӱй дене чайым йӱктен, кӧстенечым пуэн, родемым ужатен колтышым. Мӱкш пӱшкылеш гын, мӱй тамлырак лиеш, маныт. Огыда ӱшане гын, мӱкшым ашнен ончыза.