Сокта - ожнысо марий кочкыш

Вольыкым солалтыме годым вӱржым кӱмыжыш погат. Кӧргӧ тырлыкшым: шӱм-мокшым, шолорам - лукмеке, шолын мучаш ужашыжым, кӧлан мыняр кӱлеш, тунар пӱчкын налыт. Шоло коямат посна ойырен кодат. Шолым, эрыктен, ныл-вич пачаш мушман да кум шагат шинчал вӱдыштӧ кучыман. 

Тиде жапыште сокта кӧргым ямдылаш тӱҥалман. Шӱрашым овартен, коям, шоган ден чеснокым тыгыдын падыштен, вӱр дене йӧрыман.

Шинчал вӱд гыч шолым луктын, угыч мушман. Ик мучашыжым шӱртӧ дене кылден, вес мучашыж гыч ямдылыме кӧргым темыман да шӱртӧ дене кылден шындыман. Кӧргыжым тич темаш огеш кӱл, кок-кум парня вочмо - кум-ныл сантиметр - яра верым кодыза. Тич темаш гын, кӱаш тӱҥалмекше, шӱраш овара, да сокта шелын кертеш.

Мискеш кок литр вӱдым опталын, пел кугу совла шинчалым, соктам пыштен, шолташ шындыза. Оварымек, име дене ныл-вич вере шӱтен, кӱын шумыжым вучалтыза (кӱмым шӱраш ошемме гыч палаш лиеш).

Соктам ышташ шукырак жап кӱлеш гынат, тиде пеш тутло кочкыш.