Мӧҥгысӧ шаурма

Кӱлеш: 3 лаваш, 500 г чыве шыл, ик-кок ужар кияр, кок-кум помидор, 200 г ковышта, соус, майонез (Кӧргыжым шукыракат ышташ лиеш).

Чыве шыл гыч коваштыжым ойырыман, тудым изи квадрат семын пӱчкедыман. «Чывылан» манын возымо приправым ешарен, салмаш жаритлыман. Ковыштам тыгыдын, киярым да помидорым кужун пӱчкедыман. Соус ден майонезым иктыш варен, лавашыш йыгыман. Тудын ӱмбаке ковыштам, киярым, помидорым да жаритлыме шылым пыштен, лавашын кок могыржым пӱген, рулет семын пӱтыралман. Салмаш пыштен, изиш ырыктыман.