«Тӱҥалат гын, чарнен от керт»

- Любовь, тиде паша дене кылым кучаш кузе кумылда лектын?

- Кидпашалан школышто тунемме годым шӱмаҥынам, тӱрым тӱрлаш шукерте огыл тӱҥалынам. Никита эргым визымше класс деч вара Йошкар-Оласе гимназийыш тунемаш пурыш. Чӱчкыдын тудын деке унала мием ыле. Каныме паркыште коштмо годым шуко гана марий орнаментан тувырым але блузкым чийыше ӱдыр-влак шинчаш перненыт. Еҥ капыште вургем эше мотор коеш, нуным ончен, мыйынат тыгай тувырым чийымем шуын. Кум ий эртымек веле шонымемым шуктен кертым. Ончыч шӱйыш сакымым да алгам ыштен ончышым, кызыт йоча, кугыеҥ-влаклан тувыр-влакым тӱрлем.

- Кидпаша дене шинчыше-влаклан эре ӧрам: ик узорым гына тӱрлаш мыняр чытыш кӱлеш. Тидын шотышто тендан кузерак?  

- Кеч-могай паша деч пайдам налын моштыман. Тӱрлымӧ годым кидысе моторика пашам ышта, тидлан кӧра уш-акыл вияҥеш, шке ыштыме моторлыкым ужын, кумыл нӧлталтеш, эше ыштыме гына шуэш. 

- Шуко тӱрлызӧ кеҥежым кидпаша дене огына шинче маныт. Те кузе шонеда?

- Чон йодеш гын, кеҥеж ма, теле, кидпашам садак ыштет. Ялыште паша нигунам ок пыте, поснак кеҥежым шуко. Ме кум ушкалым ончена, мӱкшотар уло, садлан кидпаша дене шинчыме шуэш гынат, жап ок сите. Кумыл йодмо годым сомыл коклаштак кидпашам ыштен налам.