Тӱрым тӱрлаш авам изинек туныктен. Ныл ӱдыр чыланат тӱрлена. Кеч-кӧ изи паша гыч ошкылым ышта. Икымше пашам нершовыч ыле, кугурак пашам - кӱпчыкшӱргым - 5 классыште тунемме годым тӱрленам. Вара тувырымат тӱрлаш тӱҥальым», - палдара Олеся Михайлова.
Марлан пошкудо Озерка ялыш лектын. Тушто кевытыште ужалышылан, вара ялысе клубышто методистлан ышташ тӱҥалын. Концертыште выступатлаш тувыр-влак кӱлыныт. Ондак ансамбльжылан тӱрлыман ош тувырым келыштарен, вара моло тувырым тӱрлаш тӱҥалын. Изи годсек тӱрым тӱрлышӧ еҥын пашаже шуко погына: изи йоча, кугыеҥ, ака-шӱжар, йолташ-влаклан солыкым, тувырым тӱрлен. Кызытат яра жапше улмо годым куштышо йоча ансамбльлан выступатлаш тувырым тӱрла. «Лента денат тӱрлаш тунемаш шонем, но кызыт жап ок сите», - каласыш Олеся Михайлова.