Калык шуко погыныман верыште телефоным йӱкдымӧ але вибраций режимыш кусарыман. Еҥ-влак коклаште улмыда годым тыланда вучыдымын йыҥгыртеныт гын, пелейӱкын пелешташ тыршыза але пӧлем гыч лектын ойласыза. Общественный верыште видеом ончаш, музыкым колышташ, модаш сай огыл. Кинотеатрыште, поездыште, телефоным йӧртен, сумкаш але кӱсеныш пыштыза. Ончылгоч шижтарыде, эн лишыл еҥ-влаклан гына йыҥгырташ лиеш. Моло деч йыҥгырташ лийме нерген сообщений гоч йодман. Палымыдан але йолташдан телефон номержым, тудын деч йодде, вес еҥлан пуыман огыл. Йӱкан сообщенийым эн лишыл еҥлан гына колташ лиеш. Моло годым рашемдаш кӱлеш: абонентлан тыге ойласаш йӧнан мо? Паша вер гыч вуйлатыше йӱкан сообщенийым колтен гын, пашаеҥ тудлан текст дене вашештышаш. Ойласыме годым кыл кенета кӱрлын - тугеже, йыҥгыртыше еҥ угыч кылым ыштышаш. Йодде, еҥын телефонжым кучылташ огеш йӧрӧ.
Школышто тунемше ӱдыр-рвезылан ава-ачашт ушештарышаш улыт: урок годым телефоным, йӧртен але йӱкдымӧ режимыш чӱктен, рюкзакыш пыштыман, школышто фотом, видеом ыштыман огыл. Шергакашан телефоным налында гын, икшывылан умылтарыза: йолташыже-влак ончылно моктанен, чыла функцийже дене палдараш ынже тырше. Ача-ава икшывыжын расписанийжым палышаш: урок годым тудлан йыҥгыртыман огыл.
Чылан тиде правил-влакым шарнат гын, телефон дене мутланыме годым иктат йырым-йырже улшо еҥлан йӧндымылыкым ок ыште.