Шонымашна-влак шукталтышт!

Чылан кумылна шукталтмым вучена. Икте пачерым налнеже, весе машинам йодеш. А мыйын йолташ ӱдыремын кугу куан! Нуно ялыште пӧртым нальыч, лач пӧрт кӧргыштыжӧ гына шуктышаш паша кодын. Садлан йолташем изин-кугун латкок шагатым вучыш. Кече мучко ӱстелыш кочкышым ямдылен, жап эртымым ышнат шиж. Ондак соцлаштыкыште, шонымаш шукталтше манын, У ий кастене кузе да мом ыштышашын радамжым муын лукна, вара чыла кӱлешым ямдылышна. Мыланна шырпе, лаштык да ручка кӱлыныт. Йодшаш ойым кагазеш возыман, тудым йӱлатыман, а ломыжшым шампанский кленчаш кудалтыман да пундаш марте йӱын колтыман.

Чылан ӱстел йыр погынен шогалмеке, пӧръеҥ-влак шампанскийым почаш тӱҥальыч. А ме ручка да кагаз дене шогена, жапым вучена. Теве шагат «латкокытым» кыраш тӱҥале. Мый писын гына кок мутым удыральым да йӱлаташ пижым. Изи лаштык писын йӱлен пытыш. Мый тудым тунамак шампанскийым темыме атышкем кудалтышым да йӱын колтышым. 

Йолташ ӱдырем гын… Ала шонымашыже кужу лийын, ала лаштыкше кугу лийын… Ончем, пелыжым гына йӱӧ да кенета ошем шинче, вара кандалгаш тӱҥале. Тидым ужын, нимом ышташ ӧрын, мый тупшо гыч перен колтышым. Умшаж гыч лаштык лектын возо. А тушто лач кум буква - «ПӦР». 

…Изиш шинчымеке, йолташ ӱдырем каласкалаш тӱҥале. «Шагат кыраш тӱҥалмек, ом шукто манын, йӱлен пытымыжым вучыдеак, лаштыкемым шампанский атыш кудалтышым. Йӱаш тӱҥальым, а тудо логарешем шинче. Ушем дене мылам илышым пӧлеклымыжлан ондак авамлан тауштышым, вара икшывем-влак дене чеверласышым, пытартышлан пелашемлан тошто машинам завещаний гай тыланышым. А тый мыйым туге перышыч, лаштык гына огыл, вуйдорыкем лектын возеш, шонышым. Тетла нимогай пайремланат нимогай шонымашым шукташ ом йод!» 

Ончалына теве. У ий пайремлан жап шукат кодын огыл. А тиде томашам пырля погынымына годым эре шарналтен воштылына.