Сӧрал арверым тодаш туныкта

Адакше Надежда Витальевна тӱрлым ыштылаш гына огыл, тидлан туныкташат мастар. 2008-ше ийыште Бирск кугыжаныш академийыште биологий да химий факультетым тунем лекмек, ик жап Нефтекамск оласе «Искожышто» химический анализ лаборантлан, Ардаш ялсоветыште пашам виктарышылан ыштен да, еш дене Бирскыш илаш куснымек, «Вояж» ешартыш образований рӱдерыште чонлан келшыше пашам верештын. Ынде экологий пӧлкаште визымше - кандашымше класслаште тунемше икшыве-влакым тӱрлӧ кидпашам ыштылаш туныкта.

Йоча-влаклан, мом ужыт але темлат, чылажат оҥайын чучеш. Ешартыш образований педагогышт дене пырля шер гыч брошкым, мотор кидшолым ыштылыт, меж гыч модышым, курчаклан портышкемым йӧрат, пырыспочшудо гыч сувенир шляпам, парнявуеш гына чияш йӧрышӧ изи йыдалым, тӱрлӧ кугытан ате-влакым да молым тодыт. 

Тунар йочалан материалымат ситараш кӱлешыс. «Пырыспочшудым кеҥежым Эдуард пелашем дене коктын погена. Эҥер воктен, лопрак верлаште тудо лыҥ кушкеш. Тыгай вер-влак шочмо-кушмо Мишкан районысо Ардаш ялна воктенат шуко улыт. Вара ты шудым коштыман да аралаш пыштыман. А арверым тодаш тӱҥалме деч ончыч, шонымо семын пӱтыркалаш йӧрышашлык лийже манын, иктаж пел шагат наре вӱдыштӧ кучыман», - каласкала Надежда Витальевна. 

А эше тудлан шун гыч сӧрал сувенир-влакым ыштылаш келша. Шкежат тунемеш да чӱчкыдын коллегыжлан мастер-класс-влакым эртараш полышкала. Чынакыс, кумыл да жап лиеш гын, илышыште чылалан тунемаш йӧным муын кертына.