Все новости
Каналтыме годым
3 теле 2022, 09:35

Окна ончылнем - олмапуэм

Кӱкшӧ курык вуй ӱмбачын Олмам колтем - кучыза. Иктаж умыр шып кастене Миен шуам, вучыза.

Окна ончылнем - олмапуэм
Окна ончылнем - олмапуэм

Олмам пуэм, кочкат гын,

Кӱсенышкет пыштет гын.

Ончыкыжат пырля илена,

Вуйна эсен лиеш гын.

 

Олмам пуэм, налат мо?

Носовикем кылдет мо?

Кидем пуэм, кучет мо?

Ӱмыр йолташ лият мо?

 

Олма пеледышан 

                            ош шовычем

Эре пидмем вел шуэш.

Таҥым кучымо йолташемым

Эре ужмем вел шуэш.

 

Олмамат кочмем ок шу,

Чайымат йӱмем ок шу.

Олма гае йолташем деч

Ойырлымемат ок шу.

Олма пакчаш тӧрштен 

                             пурышым,

Налын лектым ал олмам.

Налын лекме олма гае

Йӧратышым мый тыйым.

 

Окна ончылнем - олмапуэм,

Олмапу йымалне - 

                      шоптырвондем.

Олма гае чуриян, 

                      шоптыр шинчан

Уло мыйын йолташем.

 

Олма кӱэш - кӱрлын возеш,

Ит нал, ит коч, йолташем.

Тора улат, ом уж манын,

Ит кудалте, йолташем.

 

Олма йошкарген кӱэш да

Йоген шога вет тудо.

Рвезе ӱмыр кеч-кӧ дечат

Кодын шога вет тудо.

 

Сер ӱмбалне ал саскажым

Кӱрлын налаш лийже ыле.

Олма гае чуриетым

Кечын ужаш лийже ыле.

 

Олмам поген колтем ыле,

Ужаргыже ок лий гын.

Ты серышым ом сере ыле,

Чонем огеш йӱлӧ гын.

 

Олма лиеш гын йошкарге,

Ужаргыже огеш кӱл.

Йолташ лиеш гын шкемын,

Мылам еҥын огеш кӱл.

 

Олмажат кӱэш кызыт,

Чиежат кӱэш кызыт.

Олма, чие кӱмӧ годым

Ушешет возеш кызыт.

 

Олма саска ал веле,

Олма саска гӱл веле.

Ай, ал веле, ай, гӱл веле - 

Шонымашем тый веле.

Автор:Е. НИКОЛАЕВА поген. Нефтекамск ола.
Читайте нас: