Вафли там

Икана ачам пашадарым налынат, мыйым, школышто тунемшым, кевытыш шагатлан батарейым налаш колтыш. Мый, изиэт, кевытыш тӧрштыл-тӧрштыл миен пурышым. Ончем, вафли тунар чот тамлын койын кия. Шым чыте, ачамын налаш кӱштымӧ батарей олмеш вафлим йодым. Мӧҥгӧ миен пурышымат, ачамлан «Тудет уке ыле» манын каласышым. Ачам, «Эрдене гына ыле вет» манын, мыйым эше ик гана кевытыш колтыш. Мый уэш кайышым, миен шуым гын, вафли адак «Олю, мыйым нал» манын кия. Мый адак, ик килограмм вафлим налын, мӧҥгӧ куржым. Адак ачамым чиялташ вереште. Тыге ме тудо кечын вафли пайремым ыштышна. Изам дене коктын шер теммеш кочна. Тудын деч вара ожсо годсо вафли там кызытат умшаштем. 

Photo by Shankar Mridha on Unsplash