Кӧ титакан?

Теве ик кастене Саша Таня дек каяш тарваныш. Уремыште игече сай, кечывалым шокшо гын, кастене леве юж пуал колта. Каваште шӱдыр-влак йолгат, кайышаш корным тылзе волгалтара. Рвезе, пакчашкыже пурен, изирак пеледыш аршашым ыштыш да Танян илыме пӧрт велыш ошкыльо. 

Таня - пеш тыматле, поро кумылан ӱдыр. Тудо коваж дене пырля ила. Ава-ачаже, моло еҥ семынак, илаш оксам ситараш да ӱдырыштым сайын чикташ манын, кугу олаште пашам ыштат. 

Кас сомылым пытарен, ӱдыр воштончыш ончылно пӧрдеш. Коважлан 75 ият темын, ынде рвезе гай куржтал коштмо пагытше эртен, садлан койкыш каналташ возын. Теве пылышыжлан пырыс йӱк солныш. Кова тунамак кынеле да пӧртӧнчык лекте. Шинчажлан ӱстел йымалне йот шем пырыс койылалтыш. Кова тудым кучыш да, «Пшол тышеч» манын, кудывечыш луктын колтыш. Тиде пагытыште Саша ӱдырын капка ончыкшо толын шуын ыле. 

Шӱмжылан кроп чучо, «Чу, тиде Таня мылам тыге мане мо?» шоналтыш. Ик жап ӧрын-айманен шогылтат, Таня деч шкеж дечак йодаш шонен пыштыш. А ты жапыште пӧрт гыч лачак Таня куржын лекте. 

Но, Сашам ончалын, весела кумылжо шулыш, ала-мо лиймым шиже. «Саша, мо лийыч, молан шӱлыкан коят?» - йодо. Саша кызыт гына мо лиймым каласкален пуыш. А ӱдыр вашеш йӱкын воштыл колтыш. Саша эшеат чотрак ӧрӧ. «Ковам кызыт гына йот шем пырысым, «Пшол» манын, пӧрт гыч поктен лукто, а тый ковам тыйым шӱрдыл каласыш манын шонышыч мо?»

Ындыже Саша ден Таня коктынат воштыл колтышт, вара, кид кучен, клубыш ошкыльыч.