Мотор пеледышым, светильникым ышта

«Мылам эре иктаж-мом оҥайым шонен муаш келша. Декрет отпускышто улмем годым, социал лаштыкыште оҥай кидпаша-влакым ужын, шкаланем кугу пеледышым ыштымем шуо. Ме тунам лач у пӧртыш илаш лектынна ыле, - ойла Лилия. - Мо кӱлешым налмек, пашалан пижым. Чылажымат ик шӱлыш дене ыштенам. Тунам пашам-влак эн мотор койыныт». 

Икымше пашаже ӱстембак шындыме светильник лийын. Тудым ужмек, шочшыжо-влак тыгаяк светильникым ыштен пуаш йодыныт. Тӱрлӧ социал кылыште паша-влакын фотоштым вераҥдымеке, еҥ-влакын йодмышт почеш ышташ тӱҥалын. Лилия чӱчкыдын тӱрлӧ видеороликым онча, шинчымашыжым эре пойдара. Эн изи гыч тӱҥалын, кок метр кӱкшытан марте пашаже-влак улыт. «Пелашемлан полшымыжлан таум каласем. Тудо паша деч вара, йӱдым, светильниклан тулым ышташ полшен гын, кечывалым озашт деке машинаж дене тӱрлӧ районлаш да олалаш шупшыктен», - ойла Лилия. Эре пелашыжым йодаш огыл манын, вара шкеат тулым колташ тунемын. Светильник деч посна тӱрлӧ ручка, заколка, бантик-влакым ыштылеш. Тыгак йочасад, школ, кевыт, кафе-влаклан фотозоным ямдыла.