Ик ямле кечын авам ден коктын пакчаште йыраҥ-влакым сомылен шогылтына ыле. Кенета пылышлан сигнал йӱк солныш. Ме, шуко шоныде, пашанам кудалтышна да кудывечыш куржна. Коктын газ баллоным уремыш шӱдырен лукнена. Капка ончык намиен шындышнат, изин-кугун кугу машинам вучаш тӱҥална.
Теве сигнал йӱк мемнан уремыш шуо. Но мо тыгай? Кугу машина олмеш изи машина-влак кӱзат, окнашт гыч флаг лойгалтеш. «Таче пайремыс, могай газ баллон!» - волгенчыла волгалте ушышто. Машина-влак утыр лишемыт, а ме авам дене коктын газ баллоннам ындыже кудывечыш шӱдырена. Пуртен шогалтышнат, уэш уремысе теҥгылыш лектын шична, пуйто иктат нимом шӱдыркаленат огыл… Тулеч вара тиде пайрем кечым мондымаш уке, уэш-пачаш шарналтен воштылына.