Кидпашалан Любовь Ильинична изинек шӱмаҥын кушкын. «Йоча жапем годсек тӱрлем. Школышто тунеммем годымак чылдарым пидынам. Труд урокышто тӱрлымылан мыланна отметкым шындат ыле. Садлан тыршаш логалын, тыге мастарлыкым тунамак таптен кушкынам», - ойла шымле кум ийым эрталше кидмастар. А кызыт тудо йӧратыме сомылжылан чыла гаяк яра жапшым пӧлекла, ятыр ий сулен налме канышыште улеш. Павасола ялын шочшыжо самырыкше годымак Тошто Яш ялыш марлан толын да ӱмыржӧ мучко верысе школышто йоча-влаклан немыч йылмым, историйым, руш йылмым да литературым туныктен. Шке жапыштыже Йошкар-Оласе Марий кугыжаныш педагогика институтын историй да филологий факультетшым тунем пытарен.
Туныктымо пашан ветеранже ийготлан вуйым ок пу. Вий шутымо семын суртвольыкым, кайыквусым онча. А сад-пакчаштыже шошым-кеҥежым тӱрлӧ сӧрал пеледышым, емыжым кушта. Пиалан кова шукертсек уло кумылын тӱрлӧ газет ден журналым налеш, вет лудмаш - тудын эше ик йӧратыме хоббиже.