Все новости
Каналтыме годым
1 Сӱрем 2022, 10:37

Кидпашалан изинек шӱмаҥын

Уста еҥын кидыштыже кеч-могай сомылат устан ворана. А илышыште да шке йырет моторлыкым шараш мастарлык деч посна эше сылнылыкым ужын да шижын мошташ кӱлеш. Тыгай сылне йыргешке паласым да шовычым, пӱкеным, кӱпчыкым леведаш, диваныш, креслош шараш изирак мотор коврик-влакым Калтаса районысо Тошто Яш ялыште илыше Л.И. Каляутдинова сӧрастара. Крючок дене мастарын пидме веле огыл, Любовь Ильинична тӱрлашат йӧрата. Фотош войзымо кӱпчыкшӱргым, чийыме марла тувыржымат шкеак урген да тӱрлен. Пидаш, тӱрлаш чонлан келшыше тӱрлӧ чиян шӱртым кевытыште наледа. Узорым, композицийым шкеак келыштара.

Кидпашалан Любовь Ильинична изинек шӱмаҥын кушкын. «Йоча жапем годсек  тӱрлем. Школышто тунеммем годымак чылдарым пидынам. Труд урокышто тӱрлымылан мыланна отметкым шындат ыле. Садлан тыршаш логалын, тыге мастарлыкым тунамак таптен кушкынам», - ойла шымле кум ийым эрталше кидмастар. А кызыт тудо йӧратыме сомылжылан чыла гаяк яра жапшым пӧлекла, ятыр ий сулен налме канышыште улеш. Павасола ялын шочшыжо самырыкше годымак Тошто Яш ялыш марлан толын да ӱмыржӧ мучко верысе школышто йоча-влаклан немыч йылмым, историйым, руш йылмым да литературым туныктен. Шке жапыштыже Йошкар-Оласе Марий кугыжаныш педагогика институтын историй да филологий факультетшым тунем пытарен. 

Туныктымо пашан ветеранже ийготлан вуйым ок пу. Вий шутымо семын суртвольыкым, кайыквусым онча. А сад-пакчаштыже шошым-кеҥежым тӱрлӧ сӧрал пеледышым, емыжым кушта. Пиалан кова шукертсек уло кумылын тӱрлӧ газет ден журналым налеш, вет лудмаш - тудын эше ик йӧратыме хоббиже.

Авторын фотожо-влак.
Авторын фотожо-влак.
Авторын фотожо-влак.
Авторын фотожо-влак.
Авторын фотожо-влак.
Авторын фотожо-влак.
Авторын фотожо-влак.
Авторын фотожо-влак.
Фото:Авторын фотожо-влак.
Автор:Людмила Шавалиева
Читайте нас: