Пайдале каҥаш. Кеҥеж шокшо годым

Кече пелтыме годым 

- натуральный куэм гыч ургымо вургемым чийыза;

- тыглай але минеральный вӱдым, ужар чайым (вергыда ок коршто гын, кечеш 2-2,5 литр наре) йӱза;

- кече йымалне шагалрак коштса, вуеш панамым, кепкым упшалза;

- шокшо годым 12 гыч 16 шагат марте уремыште пашам ида ыште;

- аракам ида йӱ, тазалыклан эҥгек лийын кертеш;

- шукырак пакчасаскам, фруктым, кисломолочный кочкышым, арняш 3-4 гана колым кочса;

- чӱчкыдынрак вӱд дене чывылталтса;

- 25 градус деч шокшырак годым уремыште спорт дене ида заниматле.

Кечаныште коштмо гына огыл, шокшо пӧлемыште петыралт шинчымылан кӧра кап-кыл утыжым ырымат эҥгекым ыштен кертеш. Тыгай годым «шокшо логалын» манын ойлат. Айдеме вуй корштымым, шӱмжӧ чӱчкыдын кырымым, укшинчыктымым шижеш. Тудлан полшаш манын, ӱшыкыш але юалгырак пӧлемыш пышташ, чот йӧслана гын, «вашкеполышым» ӱжыкташ кӱлеш.

Пеледше кушкыллан аллергий уло гын 

- кушкыл пеледме годым уремыш шуэнрак лекса;

- маскым але респираторым чийыза;

- пачер окнам петырыза, кӱварым чӱчкыдынрак мушса; 

- мӧҥгыштӧ кондиционер дене але вес семын южым эрыктыза;

- нерым, шинчам вӱд дене шӱалтыза;

- врачын темлыме почеш антигистаминный эмым йӱза.

Насекомый пурлын гын

Мӱкш пӱшкылмӧ годым умдыжым лукман, ты верым шовын вӱд дене мушман да йӱштӧ компрессым пыштыман. Оварыше вер икмыняр кече корштен кертеш, а южо еҥын 20-30 минут гыч тӧрлана. Кӱлеш годым противогистаминный эмым йӱман, коржмым чараш гельым йыгыман.

Ӱвыра пурлмо годымат аллергий лийын кертеш. Тыгай годым лучо врач деч каҥашым йодаш. Аллергий уке гын, пурлмо вер ынже лӱгыштӧ манын, иктаж гельым але прополис, сода, вис-вис, шӧршудо вӱдым шӱралташ лиеш.