Кудывече капкам почын, пӧлемыш пурен шогалмекыже, самырык фельдшер ласкан гына йодо:
- Мо лийыч, кокай?
- Ой, ӱдырем, пеш йӧсла-нем, грипп пиже, омак керт, - вуйым шиеш шоҥго кокай.
Нерге пижмылан да умшаштыже пӱйжат шагалрак кодмылан кӧра шоҥгын ойлымыжым умылаш йӧсӧ, «грипп» мутшо «риф» манмыла вел шокта.
- Кокай, кӧ пиже, Риф мо? - умылынеже фельдшер.
- Туге-туге, ӱдырем, грипп пиже, - манеш адак кока.
«Грипп» мутшо адак «риф» манмыла шокта. Фельдшер ӱдыр окнаш ончал колта да пашаш вашкен ошкылшо Риф лӱман пӧръеҥын ужылалта.
- Риф, ик минутлан медпунктыш пуро але, - фортычкым почын кычкыралеш.
Пӧръеҥ медпунктыш пурен шогалеш.
- Риф, молан кокайым обижайышыч? - йодеш туддеч.
Риф йӧршын аптыранен колта. Ик мутымат пелештен ок керт, шып шога. Фельдшер кокай деч йодеш:
- Каласе, кокай, тиде Риф ыле мо?
- Ӱдырем, Риф огы-ы-ыл, гри-и-ипп, - умыландараш пижеш кока.
Ойлымыжо садак «риф» манме гай шокта гынат, ындыже фельдшер шоҥгыеҥын мом каласаш шонымыжым умылен налеш, да чылан рӱж воштыл колтат.
Фото: sabinevanerp, pixabay.com