Все новости
Каналтыме годым
26 Ӱярня 2022, 11:35

Рекламе

Ялыште илыме годым поро пошкудет лийже. Икшыве-влак кушкын шогалыт да сурт гыч кайык гай чоҥештен лектын каят. Кодшыжат посна илаш тыршат. Ача вес тӱняш каяш вашка, пӧртеш шоҥго ӱдырамаш веле кодеш. Теве тыге Изикай ден Салбика шкет кодыныт. Кечын ӱдырышт-эргыштым вучен илат. Коктын вынем воктен вашлийытат, икте-весыштым чай йӱаш ӱжыт. Пырля лийыт гын, мом гына огыт шарналте. Коктынат шочмо ялыштыштак марлан лектыныт, колхозышто пашам ыштеныт. Ынде шоҥгылыкыштымат пырля эртарат. Йӧра эше кугыжаныш пенсийым пуа, вес пенсий марте оксаштым ситараш тыршен илат. Толшаш икшывыштланат мом-гынат налын пыштат.

tookapic pixabay.com
Фото:tookapic / pixabay.com

Кастене пырля кином ончат, вара киносо герой-влакым моктат, вурсат. Ончыч Мексика гыч толшо шуко сериян кином йӧратен ончышт. Киножо пеш кужу огыл ыле гынат, ала-молан рекламе-влакым ончыкташ тӱҥальыч. Изикай кином ончымо гутлаштак пакчашкыжат шинчам пышта. Казажым луктын колтенат, могай-гынат осалым ыштышашыжым шижынак шога. Рекламым вучен шуктышат, пакчаш куржо. А каза ковышта йыраҥышкат шуын - нигузе кудывече велыш ынеж кай. Кужурак тоям муын, содыки вӱташ петырен керте. Пӧртыш пурыш, а кино пытен. Салбика дек йодышташ кайыш. А тудыжо кином вучен-вучен да нералтен колтен улмаш. Помыжалтын - кино пытен. Вара кином пырля ончаш кутырен келшышт. 

Вес кечын Изикай Салбикам вучаш лие, но чайым шындаш вӱд ыш сите. Шуко сериян кино тӱҥале, Салбикат толын шуо. А Изикай адак рекламым вуча. «Рекламе лиеш гын, вӱдлан миен толам ыле», - шона семынже. Рекламе тӱҥале веле, Изикай, изи ведрам кучен, вӱдлан куржо, а Салбика пакчажым ончалаш лие. Кенета пече воктен изи сӧснаигыжым ужо. Салбика сӧснаигым кудывечышкыже покта, а тудет Изикайын кудывечыш пурен йомо. Изикай ден сӧснаиге вашлийыч, изи иге ӱдырамашын йол йымакше логале, да вӱд кышкалалте. Тыгудеште, шӱлешт-шӱлешт, Салбика толын шуо. Коктын сӧснаигым вӱташ петырышт. Кино ончаш пурышт - кино пытен…  

Умбакыже чыла пашам кино деч ончыч ышташ шонен пыштышт. Но южгунам мо-гынат мондалтеш. Вара рекламым ончыктымо пагытыште пеш шуко пашам ышташ тунемыч: кӱварйымач пареҥгым луктын шуктат, вольыкым пукшат-йӱктат. А вӱдшым ситарен ямдылат. Мексика гыч толшо кино нуным ӧрыктара. Герой-влак ойлышаш мутыштым вигак огыт каласе. Салбика ден Изикай тидым огыт умыло. «Мый витарен гына ойлем, тынар чытен ом керт ыле», - манеш Салбика. «Мыят ом чыте, лачкытем гына ыле», - ышталеш Изикайжат.

Кызыт Салбика ден Изикайын илышышт вашталтын. Икшывышт полшымо дене вӱдым пӧртыш пуртеныт, у чиян телевизорым ончат. Йӧратыме передачыштат уло, утларакше «ДНК» келша. Ончыч рекламе годым куржталмыштым шарналтен воштылаш гына кодын. Но садак кызытат пошкудо-влак келшен илат, тамле кочкышыштымат пырля кочкыт. Тыгак лийшаш дыр. Нуным олаш илаш ӱжыт, да шоҥго еҥлан шочмо-кушмо ялым коден каяш моткоч йӧсӧ.

Фото: tookapic, pixabay.com

Автор:Д. АПЛЕКАЕВА. Караидель район.
Читайте нас: