Каныш кечын - театрыш

Мыланемат тиде шуматкечын Нефтекамск оласе икымше лицейын туныктышо коллективше дене пырля Сарапул оласе руш драматический театрыш миен толаш йӧн лекте. Тиде коллективын моткоч сай йӱлаже уло. Нуно 23 февраль да 8 Март пайрем вашеш корпоративыш огыл, Ижевск, Уфа олаласе руш драматический, «Нур» татар театрлаш коштыт. Тиде гана маршрутыштым изишак вашталтышт.

Сарапул оласе руш драматический театр 1911 ийыште пашам ышташ тӱҥалын, Чолман воктенсе кундемыште икымше лийын. Театр изирак гынат (ончаш мийышылан улыжат кудло вер), тиде гана тушто яра вер кодын огыл, чыла билетым ужален пытарыме ыле. «Пушкин карте» дене пайдаланаш йӧнышт улмылан кӧра студент-влакат ятырын койыч.

Ме американ драматург Кен Людвигын пьесыже негызеш шындыме «Примадонны» спектакльым ончышна. Тиде драматург кызытсе илышлан келшыше пьеса-влакым воза. Произведенийлажым коло утла йылмыш кусарыме, кумло утла элыште модын ончыктат. Тӱҥ рольым Артем Шевченко, Игорь Васецкий, Евгения Короткова, Анастасия Ковальская, Михаил Еремкин, Сергей Дубовиков, Удмуртий Республикын калык артистше-влак Галина Есырева да Владимир Мельник пеш мастарын модыч, шинчавӱд лекмеш воштылтышт. Спектакльым Юрий Печенежский да Андрей Медведев шынденыт. Икымше премьерыже 2019 ийыште лийын. Антракт дене пырля спектакль кок шагатат коло минут шуйныш.

Театрым йӧратыше-влаклан вес олалашкат лектын кошташ кӱлеш, шонем. А мыланна, марий-влаклан, Марий Эл гыч толшо артист-влакым гына вучен шинчыман огыл (Пеш чаманем, южгунам тушеч кондымо спектакльымат ончаш мияш ӧрканат). Кунам вес йылме дене модмо спектакльым ончет, шонымашат, шинчаончалтышат вашталтеш, вес калыкын менталитетшым сайынрак умылаш тӱҥалат.