Армий нерген такмак-влак

Музиканым шоктен-шоктен,

Уремыш лектын каем.

Шочын-кушкын, кугем шуын,

Ынде армийыш каем.

Тӱредам да тӱредам,

Ок тол манын ончалам.

Армийыш кайыме 

                      корнышкыжо 

Ончалам да шорталам.

Армийыште, армийыште,

Армийыште йолташем.

Чевер коштын пӧртылат гын,

Тылечет вел ӱмытем.

Вӱд кондышашем уло, 

Чай шындышашем уло.

Армийыште йолташ уло,

Кок ий вучышаш уло.

Йолташ, армийыш кает гын,

Ал шовыным налын тол.

Алет огӱл, гӱлет огӱл,

Таза-эсен коштын тол.

Кӱшкат кӱзена кызыт, 

Ӱлыкат волена кызыт.

Армий гычын толмет мӧҥгӧ,

Пырля лийына кызыт.

Йӱр лийшаш гае чучеш,

Лум лийшаш гае чучеш,

Служитлыме верже гычын

Толын шушаш гай чучеш.

Ал ведра, гӱл ведра,

Теве чияже кая.

Досет дене ит моктане, 

Теве армийыш кая.

Кадыргале, кудыргале

Тошкен лекме ломашем.

Эше ик гана каласем, 

Кок ий вучо, йолташем.

Машинаже кайыш ынде,

Шикшыже кодо ынде.

Ой, йолташем, кайышыч 

                                  ынде,

Шкетак кодым ынде.

Кӱшнӧ-кӱшнӧ пыл коклаште 

Аэроплан чоҥешта.

Мӱндыр-мӱндыр йот элыште

Мыйын йолташ служитла.

Мурыш куку, мурыш куку, 

Мурыш, чоҥештен кайыш.

Ош колъялукым рӱзалын,

Армийыш лектын кайыш.

Кече лектеш йошкарген,

Кугу ер йыр савырнен.

Толдымашын каен огыл, 

Толеш кызыт савырнен.

Инак воктен арамаште

Заҥгар саска пеледеш.

Мыйын досем армийыште,

Кок ий гычын пӧртылеш.

Имне йӱкташ волымет годым

Ведрам налаш ит мондо.

Йолташ, армийыш кает гын,

Язу сераш ит мондо.