Циолковский шке тунемын

А те паледа мо Циолковскийын учёный-самоучка улмыжым? Изиж годым тудо скарлатина дене черланен да соҥгыра лийын, сандене школышкат коштын огыл. Костя изинек шкевуя тунемын, школышто тунемше ийготан улмыж годымак конструироватлаш да эксперимент-влакым эртараш тӱҥалын. Мутлан, тудо шуаш лийдыме предмет марте кутышым висен кертше приборым - астролябийым, токарный станокым, водород дене темыман аэростатын кагаз модельжым ыштен. Туныктышо лиймекше, шкаланже кӱлешан книга ден журнал-влакым серыктен да чоҥештылше аппарат-влакым конструироватлен. Модельлан кӱлеш арверым шкеак йӧнештарен. Планета-влакым ончаш да шымлаш пӧрт вуешыже обсерваторийым ыштен. Пӧрт коклаш аэродинамический трубам вераҥден да пу гыч келыштарыме модельже-влак дене опыт-влакым ыштылын.

Нимогай прибор деч посна тудо Мланде йыр чоҥешташ келшыше кӱкшытым шотлен луктын. Тиде Мланде ӱмбач 300 гыч 800 километр марте. Лачак тыгай кӱкшытыштӧ кызыт ракета-влак космосышто чоҥештылыт.

Тачат К.Э. Циолковский ракетым ыштымаште да космонавтикыште эн палыме да пагалыме учёный улеш.